Read Northern Rengma Naga ZAKECI 22 Bible Online

ZAKECI 22 - Northern Rengma Naga bible

ZAKECI 22

¹[22] INyiza, iNyiza, no mangkesa na hi teshidha nu? hi kiqa cülo magha qai, isala kekiqa na ngho.

²Hi aghanan wi no cichi, iNyiza, isala no hi nluneng; hi aghaja wila ci, isala mnan meya.

³Isala no kemetha kesü sa nu kadipen wi ben, Israel nyithu na seng ketenwa tsüle.

⁴Ithu bamyithu na mathu kenondi pi nmiwi chi; mathu na no nondi, nu no mathu hangsha cü.

⁵Mathu na no cichi nu kemessi wina shhuya; mathu na no nondi nu accükwenshü nsa.

⁶Isala hi tsü anyi ti la nye dha le; hi acanie kesü ti, anyi tsüdila hi nan nontssü nu nankeqhedha!

⁷ Hi kemu nyi tsüdila hi nankeqhe; mathu mili ssi nu mathu li kejen.

⁸ Mathu na khi, “No APVÜWA maghakiden. mangkesa na ma no hangsha ncü nu? APVÜWA na no nen lethu, mangkesa na ma no kiqa ncü nu?”

⁹Hi kepvügha wi noncca keghowa tsüna no le, nu hi meme sa keben wi no hi noncca cü.

¹⁰Hi pvüghakeya ghanan nten hi no maghaki gho, nu no keshüthangla iNyizawa sagho.

¹¹Hi ssinu temeja bvü nsala! Agükeccü tetsakidha, nu kekiqa nyi kesüla nmi.

¹²Aghinyi kejon na amesü süponthu ti hi vüben; mathu tsüdi hi vü sen ben, mathu na Bashan yyi wi amesü süpon ghekina ti.

¹³Mathu na ssensitemi ti mathu pang ka, ghamo nu hi ghan le saben.

¹⁴Hi kezü na bvüdha, atssü na ayyi wi lle kewa ti sa bvüdha. Igüthu na nkeshunkili ladha; ileben na anie lleghe kesa ti sadha.

¹⁵Igiyan na ayyinikhu ti kiqha, nu imili na ikhala wi daki. Hi ya shü thsüale no hi teshi pi ayyinikhu wi chidha.

¹⁶Anyi nkemehai khang na hi vüya; mathu na affü zi kesü ti hi tetsaki; mathu na ikwen nu iccüthu mekü.

¹⁷Igü tsüdila mu wadha. Ighinyithu na hi ghang nu mathu qhethiketen sa.

¹⁸Mathu na ithsümenithu pi akezen wwi, nu pi mathu jawi gishü ya.

¹⁹O APVÜWA, hi ssinu ntemeja lalo! Wan gho hi kiqa cülo!

²⁰Njünnu wina hi hangsha cülo; affü hathu wina hi kahang hangsha cülo.

²¹Ssensitemi hathu wina hi hangsha yalo; hi amesü süpon hathu tuwi mangla sa meyadha.

²²No kulikechi tsüpi inyithu kizaden; hi mathu saghu keben wi tsü no seng den:

²³“Ma senglo, nthu APVÜWA maghathu! Ma külo, nthu Jacob shicüthu! Ma kinyilo, nthu Israel nyithu!

²⁴Ma ketha-uthu n-ghangchi nyelela mathu gükeccü nchüla sa nten; ma mathu wina khapeghe bvü nten, isala mathu kiqa cülo khie kechi tsü ya cüden.”

²⁵No kulikechi ghena anyithu na saghu keben witsü hi no seng den; no kinyi ketenthu ketenpen wi tsü hi ahhansha sale khishiketheng tsüpi no cüden.

²⁶Ketha-uthu na kedsamvu dsaya den; APVÜWA wi keghothu na ma seng den. Mathu yala anuphan wila mehai keyawa sa!

²⁷Mizzatentithu tsüdila APVÜWA meshen yaden. Ayyi tsüdi wi mathu na ma wi kheneng gho; amizza tsüdila ma kinyi den.

²⁸APVÜWA na kadimiwa, nu ma mizzatentithu miwi kekhang sen den.

²⁹Kekapvü nyi tsüdila ma tuwi kukedu den; shü keten nyi ha tsüdila ma tuwi kukedu den.

³⁰shagha keten shicü tsüdila ma kekuli sa den; anyithu na APVÜWA cüki khipi shagha keten shicü kiza den.

³¹Anyi npi kepvüghathu wila kiza: “APVÜWA na ma nyithu hangsha cüle.”