Read Northern Rengma Naga ZAKECI 31 Bible Online

ZAKECI 31 - Northern Rengma Naga bible

ZAKECI 31

¹[32] APVÜWA, hi khweyale no wi gho; hi ya nyu nchala nsa thsüla. No ketsatan Nyizawa; hi hangsha yalo, hi khieben!

²Ihhai kina cülo! Khili hi hangsha yalo! Hi khweyale itsonhi saya; hi hangshayale isheikepiwa sayalo.

³No isheikepiwa nu ikhwetiwa; no khishi ketheng ti ilentsütson nu hi ssilo.

⁴Aca pi hi die ketheng wina hi hangsha cülo; kemessi wina ikekhwen sayalo.

⁵ Hi ketanla hi pi no nondi chidha. No hi hangsha yaben, APVÜWA; no atsentsa Nyizawa.

⁶No milikemesa cenpvü kinyi ketenthu tsü nanmeghü den, isala hi no nondiden.

⁷No ghaliki keten ghena hi nen, nu inonghe le. No igükeccü tsü mu; no hi ketizenkesa chüben.

⁸No ighinyithu yala hi ghanya thsü nsa; hi kewa mvu witsü no hi yala hi kesasa wa thsü.

⁹Hi nantizen cülo, APVÜWA, kepaghenanye hi agükeccü wi bendha le; qai ntsa kesa wi inyon naadha; hi nchatha sadha.

¹⁰Ahathakina ghena hi kekhang nmi, nu kiqai ghena hi kahangli meludha. Igükeccü tsüdi ghena hi tsiedha; igüthu la nzü ladha.

¹¹Ighinyithu tsüdi, tsü miwila ijenphonthu hi nkhichi ladha; hi kechüthu na hi messi; mathu alen wi hi mukeya wi itubvü den.

¹²Hi shü kesa ti anyi tsüdila hi malidha; hi pala pi khala keten ti sadha.

¹³Hi aghinyithu na ighüsa keben za; kemessi na hi vüyadha. Mathu hi matangle kidenben, hi pathiale kidenyadha.

¹⁴Isala hi kenondi tsüna nmiwi ben, O Apvüwa; no iNyiza le.

¹⁵Hi keshüthang wila nkwen wi ben; ighinyithu wina hi hangsha cülo, hi meten-mesha ketenthu kwen wi tsüna.

¹⁶Keccaketssü pi nmaghawa ghangchi; no ghaliki keten wi hi hangsha cülo.

¹⁷Hi no ciden, APVÜWA; hi yala kejügheya thsü nsala. Nketsatanthu ya kejügheya thsü; mathu ya ceen nu keshü yyi wi wa thsülo.

¹⁸Milikemesathu ya ceen ben thsü— dithang nu kapvü ketenthu tsüdi ketsatan nyithu nkekhichi jühkhi.

¹⁹No nyuwakü ketenthu ghena pala kemehai pi ketheng tsüna khatila amansa nu! No khatila menhai khe anyi tsüdila chüben, no nondi ketenthu tsü no khatila tsüthu khwe ten nu!

²⁰No ketenpen kemessi nkemi wi tsü mathu pi kuthi cü, anyi cho nkemehai wina; mathu ghinyithu na mathu nkhichi kesa wi no mathu pi kemessi nkemi wi kuthi den.

²¹APVÜWA senglo! Nyu hi vü nu hi matang keben wi mang khatila amankesa wina hi ghali cü nu!

²²Hi messi nu ma ketenpen wina hi jügüshidha le kesa meshen. Isala ma hi kiqai hhai kina cü, hi ma wi kekiqa khie kechi wi.

²³APVÜWA ghaliyalo, nthu leben tsentsa sala ma nyi sa ketenthu tsüdi. APVÜWA na atsentsa wi ben ketenthu khwe, isala pi kekapvüthu kecü-u wina kemeten pi mathu cüden.

²⁴Zükeqhe benya, kempvüza sayalo, nthu APVÜWA wi ghang ketenthu tsüdi.