Read Northern Rengma Naga ZAKECI 35 Bible Online

ZAKECI 35 - Northern Rengma Naga bible

ZAKECI 35

¹[35] Hi matang ketenthu matang cülo, APVÜWA, nu hi ssikesali ketenthu ssikesali cülo.

²Ntsonhi nu nghighethu pvüya, nu gho hi hangsha cülo.

³Npie nu ampvü zanki pi hi keka ketenthu matang cülo. Hi hangsha cüle kesa njüh khishi chilo.

⁴Hi pathiale kiden kebenthu yala khang meyala kejüghe mu keyawa sa! Hi matang ketenthu yala mathu kivvü, nu asen kheneng kesawa sa!

⁵APVÜWA nyilowa na mathu keka kegho wi mathu yala ameghü na amatsi mopi bvü kesa ti sa thsülo.

⁶Mathu len jangketsü nu chenche sa keben wi APVÜWA nyilowa na mathu kihhethi kesawa salo!

⁷Ma jjügi mangla nkemi wi mathu aca sa pi hi die nu ayyiku chhü nu hi ghanyale sa.

⁸Isala mathu na tsü npi kechhü wi keyasa na gho mathu ghanya; mathu ketanla mathu ca wi yaya, nu kededi wi qanca den.

⁹Isathu hi APVÜWA ghena anonghe; hi inongheden kepaghenanye ma hi hangsha cü.

¹⁰Ileben tsüdi pi APVÜWA wi hati khiden, “Ciwi no ti kesa thola nmi. No kekhangwa kwen wina nkekhangwa, nu nyu meten-mesha ketenwa kwen wina ketha-uwa khwe cüden.”

¹¹Anyi nkemehaithu na hi nkechü kesazzithu khipi hi ghangsa nu hi shun den.

¹²Hi kemehai kulithu mathu na nkemehai kuli pi imiwi chi, nu hi yala ihathana thsü den.

¹³Isala mathu na naathu, hi ihathakina thsümeni pvü, hi kedsakejjü la zanneng; hi nkhwenca nu kekhie sa,

¹⁴hi ipvüshang nyelela icünyu ghena kekhie kesa ti. Anyi kesü na ma jja ghena kiqai ti, hi nkhwenca nu qai.

¹⁵Isala hi tsü khathansha agükeccü wi benla khe, mathu tsü mathu nonghe, nu hi vüya nu hi nankeqhe; nkechünyi la hi kiccü nu hi kihhe ben den.

¹⁶Anyithu na accü nkemehai nyi nankeqhe keten ti, mathu na hi nanmeghüthi hi ghang den.

¹⁷APVÜWA, no matsü khathu hi ghang ben ten nu? Mathu na hi matang keben wi hi hangsha cü; ssensitemi hathu wina hi hangsha yalo!

¹⁸Isathu n-nyithu saghu keben wi hi no seng ben den; mathu tsüdi tuwi na hi no seng den.

¹⁹ Milikemesa ighinyithu yala hi khang nkeya nankeqhe nsa thsüla. Ma jjügi nkemi wi hi n-nanmvu ketenthu yala ihathakina ghena mathu nonghe thsü nsa lalo.

²⁰Mathu na ashukesa jühkhi nten; tsüti kesawa nyela mathu na kecca ghali keten nyi miwi milikemesa kepapa tsüdi bhashi cüden.

²¹Mathu na hi nansa, nu jisha, “Ithu na no kekuli tsü mudha!”

²²APVÜWA, isala no ha mudha. Tsalina ceen nben lalo, APVÜWA; kelensie wi nben lalo!

²³O APVÜWA, shagha nu isheipi chilo; iNyiza, shagha nu isheikhi chilo.

²⁴O APVÜWA, no tsatan le, tsalina hi kesazzi nmile khichilo; ighinyithu yala hi nankeqhe nsa thsüla.

²⁵Mathu ketanla mathu ccüneng, “Ithu ma papidha! Tsüna ithu kenmvuwa!” isa nkhi thsü lalo.

²⁶Hi ketizenkesa wi hi nankeqhe ketenthu ya nyu nchala mathu kivvü ntsa sa thsü kesawa sa; imiwi mehai le khi ketenthu ya kejügheya, nu hathakina mukeyawa salo.

²⁷Hi kesazzi nmidha kesa ghang mvu ketenthu ya nonkeghe wi jisha, nu hati khila khineng kesawa salo, “APVÜWA na khatila di nu! Ma maghawa mehaikeya tsüna ma kenen le.”

²⁸Isathu hi no ketsatan pi thangchi, nu hi atsathang wila no seng