Read Northern Rengma Naga ZAKECI 37 Bible Online

ZAKECI 37 - Northern Rengma Naga bible

ZAKECI 37

¹[37] Nketsatanwa ghena aleben güccü nsala; kesazzi kekulithu ghang pi anyon nsala.

²Mathu aghang na jü wa kesa ti wan nmila ben; mathu aghang na jü wa keten tsüti shü bvüaben.

³APVÜWA nondi nu kemehaiwa salo; kemessi nmila ayyi wi hanglo.

⁴APVÜWA wi n-nonkeghe bhaya, isathu ma nleben kenmvu pi no cüden.

⁵No ketanla no pi APVÜWA cülo; ma nondiyalo, isathu ma no kiqa cüden.

⁶Ma no ketsatan tsü sapi aghanan lapvü ti wegü thsüaden.

⁷Leben tisie nu APVÜWA na kuli keten hie benlo; anyithu na mehaikayi keben nyelela mathu nkemehai kekiden wi mehaikeya ghena leben güccü nsala.

⁸leben gükeccü nyelela aghekepvü wi ndula; tsüna agükeccü wi du keten ketan.

⁹APVÜWA nondi ketenthu na ayyiwa tsü yaya den, isala nketsatanthu jügüshiaben .

¹⁰Nketsatanthu na wan nmila den; no mathu bha lela mathu muya nben.

¹¹ Satemeni ketenthu na ayyiwa tsü yaya den, kecca nu mehai kayi kesa wi anonkwen den.

¹²Anyi nkemehaiwa na anyi kemehaiwa shun, nu ma nanmeghüthi ghang den.

¹³Isala APVÜWA na nkemehai nyithu nankeqhe, kepaghenanye wan mathu yasa keten tsü ma chüben.

¹⁴Nketsatanwa na ketha-u nu kahhatu nyi pathi cüle ma njünnu hanshiya, nu ma lamugho sateki ya, kemeshon kuli ketenthu pathiale sa.

¹⁵Isala mathu njünnu ketanla mathu süthi cüben, nu mathu lamugho tsü pashüaden.

¹⁶Anyi kemehaiwa keben keu tsüna anyi nketsatanwa keben tsüdi miwi ma men benki.

¹⁷Kepaghenanye APVÜWA na nketsatanthu kezü tsü khusen bvü cüden, isala kemehaithu khwe ben den.

¹⁸APVÜWA na ma jühkina ketenthu noncca kemehai sa cüden, nu ayyiwa tsüpi anuphanla mathu ji sa thsüden.

¹⁹Matsü nkemehai wi mathu na ketizensa nben; azeng tsüwi lela mathu kesen qo benya ben.

²⁰Isala nketsatanwa tsü shüaben; APVÜWA ghinyithu na athighithu tsüti nmila; mathu na annikekhu ti bhatagha ben.

²¹Anyi gheshighenawa na nyu ji nnaya, nu khiela pi dhineng nten, isala anyi kemehaiwa na ma kesawegü tsü mohho ntsa senden.

²²APVÜWA na sawegü pi kecüthu na ayyiwa tsü nkaya den, isala ma kishencü kesathu tsü jügüshi cüden.

²³APVÜWA na anyi khiewa nwathu yishü khe tsütson chiden, nu ma kenen sa ketenthu khweden.

²⁴Mathu na khuli lela matsü kesie ciwi ben nben, kepaghenanye APVÜWA na mathu pieki cüden.

²⁵Hi kesie hang gho khilitsü qhai wadha; isala anyi kemehai kesütanla APVÜWA na ma teshi kesa nmu nyelela ma tsangathu na kedsakejjü ghena kuwhe keten npi mu.

²⁶Matsü tsüdi wi ma kekila wina pi nyu cü nu nna thsü, nu ma tsangathu tsüna kesawegü kesü le.

²⁷Nkemehai wi khapegheya nu kemehaiwa salo, isathu nshicübvüghathu na anuphanla ayyiwa wi hang yaben.

²⁸Kepaghenanye APVÜWA na kemeshonwa ghali, nu ma nyi tsentsa sa ketenthu teshi nten. Ma anuphanla mathu khweden, isala nketsatanthu shicübvüghathu jügüshiaben .

²⁹Ketsatanthu na ayyi tsü nkaya nu ciwi anuphan hangden.

³⁰Anyi kemehaiwa jühthu tsüna metsa, nu ma keshüthangla meshon.

³¹Ma ma Nyiza yenwa tsüpi leben wi chiya, nu tsü ssinu temeja nten.

³²Anyi nkemehaiwa na kemehaiwa tsü cwen, nu pathi cüle kiden ben den.

³³Isala APVÜWA na ma teshi pi ma ghinyi kekhang wi ci nyelela ajühkekaghaten witsü ma meshensa thsüa nben.

³⁴No kaghang pi APVÜWA miwi chi, nu ma jühkhukechithu tsü kinalo; ma no kenyuwa ghena ayyi pi no cü, nketsatanthu jügüshi kesa tsü no ya mu thsüden.

³⁵Hi kuti anyi nkemehai khang ntsa kesa chü; ma Lebanon wi sedarton ti tsüdi miwi kijüki;

³⁶isala hi tsaseng pvüdhi wa nan tsü nbenla; hi tsü bha isala nmula.

³⁷Kemehai nyiwa tsü chüshiya, ketsatan nyiwa tsü ghang yalo; ccatssü keten nyi na shicübvügha ben den,

³⁸isala kesamithu tsü yasatha sadha, nu mathu shicübvüghathu la nmi thsü laden.

³⁹APVÜWA na ketsatanthu hangsha, nu agükeccü tsüwi mathu khweden.

⁴⁰Ma mathu kiqa nu mathu kekasha cüden; ma anyi nkemehaithu wina mathu hangsha cüden, kepaghenanye mathu khweyale ma wi waden.