Read Northern Rengma Naga ZAKECI 41 Bible Online

ZAKECI 41 - Northern Rengma Naga bible

ZAKECI 41

¹[41] Ketha-uthu shei meshen ketenthu na kemihhi ntsa; mathu na agüccü keben wi APVÜWA na mathu kiqa cüden.

²APVÜWA na mathu khwe nu mathu kahang noncca cüden; ayyi wi mathu sapi anongheya thsüden; no mathu teshi pi mathu ghinyithu kekhang wi chia nben.

³Mathu kesakinaa wi APVÜWA na mathu kiqa cü, nu mathu ya mehai nengya thsüden.

⁴Hi hati khi, “Hi ntu wi samidha, APVÜWA; hi nantizen cü nu hi sapi mehai cülo.”

⁵Ighinyithu na hi nkemehai khi. Hi shüwa nu nyu hi mali kesa tsüna mathu kenen.

⁶Hi ghang keghothu tsüna jühtsentsa kesathu nye; mathu na icüki nkemehai saghuya, nu wala apen tsüdi wi tsü khi den.

⁷Hi nankemeghüthu tsüdi icüki khi pi kesüsü wi kekizali, nu mathu hi meshen pi nmehai ntsa sa den.

⁸Mathu khi, “Ma keshü naa wadha; ma ma we teshi nengya nbendha.”

⁹Ipvüshang kemehai, hi ma nondi ntsa ketenwa, hi gweghe dsajjü ketenwa lela hi matang wadha.

¹⁰Hi nantizen cülo, APVÜWA, nu igwo sapi mehai neng cülo, isanu hi ighinyithu kutimen pi cü neng den.

¹¹Mathu na imiwi khangya nben, nu no hi nenten kesa hi chüyaden.

¹²No hi kiqa cüaben, hi kemeshonwa sa ketenlina; no ketenpen wi tsü anuphan hi noncca cüaden.

¹³APVÜWA senglo, Israel Nyizawa! Nansü nu anuphanla ma senglo! Amen! Amen!