Read Northern Rengma Naga ZAKECI 44 Bible Online

ZAKECI 44 - Northern Rengma Naga bible

ZAKECI 44

¹[43] Ithu khuna pi tsü zayadha, O Anyiza, ithu bamyithu na tsü cüki pi ithu kizadha, no mathu tsüwi pala keti kuli kechithu tsü, kheni wa kesa tsü wi.

²khatinu no ketanla no nkechüthu jügüshi, nu n-nyithu yala mathu yyi wi ben wa thsü lakhe; no khati mizzatenti kepathu meten-mesha, nu n-nyithu yala mehaiya thsü khe.

³N-nyithu na mathu njünnu sen nu ayyiwa tsü nka meya; mathu kekhang wina khang meya; isala no kekhang nu no kezü, no keten chüti kesa ghena, tsüna no mathu tizen tenle kesa pi ccüca kechi.

⁴No hi kadimiwa nu iNyiza le; no khangkeya pi n-nyithu cü,

⁵nu no kekhang wina ithu ya ithu ghinyi miwi khangya thsü.

⁶Hi hangshaya le kesa ghena hi ilamugho nyelela hi njünnuwa tsü n-nondi;

⁷isala no ithu ghinyithu wina ithu hangsha cü, nu ithu n-nanmvu ketenthu miwi khangya thsü.

⁸Ithu no keshüthangla na seng den, nu anuphanla keseng pi no cü den.

⁹Isala no khilitsü ithu meya mvu, nu nyu ya ithu miwi khangya thsüdha; no ithu süpahizi ssinu alen ntsen ladha.

¹⁰No ithu yala ithu ghinyithu tubvü thsü; mathu na ithu ji tsüpi mathu ji saya.

¹¹No ithu pi khaghanenithu ti pathi thsüa; ithu yala nyu yyi wi bvüzighe bvü thsüa.

¹²No n-nyithu pi ma men nkemi ti mathu pi lekete jeüa.

¹³No ithu miwi kuli kechithu tsü ithu jenphonthu na muya, nu mathu na ithu nkhichila nankeqhe.

¹⁴No mizzatentithu tuwi ithu yala nyu meya mvula kesa kesü ti sa thsüa; mathu na mathu li kejen, nu ithu nkhichila nankeqhe.

¹⁵Hi keshüthangla anyan kekinyen wi ben; kejüghekeya na hi pong,

¹⁶Ighinyithu nu hi nankemeghüthu na hi nanwikisa nu kekimenni jüh zakeya wi.

¹⁷Pala ha tsüdi ithu miwi gho lela, ithu na no mali nsa nyelela no ssinu cenkethenjühwa tsü bheghe nsa.

¹⁸Ithu na njüh meyala nsa; ithu na no ajühkhukechithu tsü nkina la nsa.

¹⁹Isala no ithu teshi pi aghangsathu jawi ithu kekiqa nmila thsüa; no kejang kedhu wi ithu teshia.

²⁰Keujüla ithu na ithu Nyizawa nkinyila nyu kepa cenpvü wi khie lethu,

²¹no tsü bhashiya metsi kepaghenanye no ithu kekuthi kemeshenthu tsüdila chüben.

²²Isala matsü tsüdi wi nghena nyu ithu pathiben, nu ithu pi khaghaneni pathiale keben ti sa.

²³Shaghalo, APVÜWA! No mangkesa jen ben nu? Shaghalo! Anuphan ithu teshi nsa lalo!

²⁴No mangkesa ithu kuthi ben nu? Ithu ketizenkesa nu agükeccü tsü mali nsa lalo!

²⁵Ithu na ayyi wi khulidu pachadha; ithu na nyu nchala ayyi wi lla wadha.

²⁶Gho ithu kiqa cülo! No ghaliki keten tsü ghena ithu hangsha cülo!