Read Northern Rengma Naga ZAKECI 5 Bible Online

ZAKECI 5 - Northern Rengma Naga bible

ZAKECI 5

¹[4] Ijühthu ha kina cülo, O APVÜWA, nu hi kaghadhi hhai la kina cülo.

²Hi kekiqa kekhie ha kina cülo, Anyiza nu hi Kadimiwa! Hi no wi khieben, O APVÜWA;

³No aghanen mitu wi ihhai kina; aghani shhugho gweghe hi kekhie sapi no wi chi nu no wina luneng kechiwa tsü nmvu nu hieden.

⁴No nkemehai kesazzi wi n-nongheketen Nyiza nye; nkemehai pi nkete wi ben thsü nten.

⁵Kekapvü nyi na ntuwi nganya nten; no nkemehai kekuli nyi tsüdi nanmeghüden.

⁶No milikemesa nyi tsüdi yasa cüden, no nyu mechu nu meten-mesha ketenthu tsü nan-nontssüden.

⁷Isala no kaghali di ntsa kesalina hi njjen wi ghoden; hi no kemetha Kekinyijjen wi kukedu nyuwakü nu no kinyiya mehai.

⁸APVÜWA, ighinyithu na ji mtsüle! Hi ya no kemeshen saya thsü; hi ya nieya thsüle kesalina nlen sapi yazi cülo.

⁹ Hi ighinyithu kekhi jüh nondi meyacha; mathu na keyasa ketan nmvuden. mathu jüh na minnunte, isala shüya kemehai kemechu na pong ben.

¹⁰Mathu meshensa nu kemeten pi cülo, O Anyiza; mathu cho nkemehai yala mathu yasa thsülo. Mathu kesami kejon nu no kematang ghena ntuwi na mathu jügüshilo.

¹¹Isala no wi kemessi nkemi mukeyathu tsüdila anongheden; mathu na keshüthangla nonkeghe khwi saya mehai. No ghaliketen nyithu khweyalo; no ghena mathu ntsakhiwa anonghe yaden.

¹²APVÜWA, no sawegü pi njühkina ketenthu cüden; no kaghaliwa tsüna atsonhi ti mathu khwe ben den.