Read Northern Rengma Naga ZAKECI 55 Bible Online

ZAKECI 55 - Northern Rengma Naga bible

ZAKECI 55

¹[53] Hi kekhie kina cülo, Anyiza; hi kekhie wina khapeghe bvü nsala!

²Hi kekhie kinachi nu hi luneng chilo; ihathakina ghena hi nchaladha.

³Ighinyithu na hi kepateqhe ghena hi keqhethiketen sadha, Gheshighenawa kemeten-kemesha ghena hi pachadha. Mathu na agükeccü sengho imiwi chi; mathu imiwi aghepvü nu hi nanmeghü.

⁴Hi messi ntsa sadha, nu keshü kemessi na hi pacha.

⁵Messi nu kedheggü na hi ghantenya; kemessi na imiwi ghodha.

⁶Hi nkhetsü ti igisha benle kesatsü; Hi pighe wa kecca pen bha wa kesa.

⁷Hi kelensie wi pighe bvü nu wala aghansha wi hangwa kesa.

⁸Hi kaghajila ameghü nu caghamo kekhang wina hi ketanla ighena ken-niepen bhaya kesa.

⁹Ighinyithu jüh kekhi ya kematen thsülo, O APVÜWA! Hi anyunuti wi yasayala, nu kekivvüthu tsü mu,

¹⁰ghaja ghanan tsü vüben, ayen kepazzi nu agükeccü na tsü pong ben.

¹¹Keyasa na apen tsüdi wila ben; alen tonti witsü nyu kepasha, nu nyu kemechu na pong ben.

¹²Keujüla ighinyi kesü hi nankeqhe ben lethu, hi kethankehi ya kesa; nu hi ssikaghashen nyi kesü ituwi kapvü lethu, hi ma wi kuthi ya kesa.

¹³Isala tsüwa tsüna no, hi kegweghewa, hi gweghe kekuli sa ketenwa, nu ipvüshang ghatsanwa.

¹⁴Ishinyi lebentsentsa sa nu keccünengli, nu gweghe kekinyijjen wi kinyi.

¹⁵Ighinyithu na mathu tsü npi kecu wina shü thsü kesawa sa; mathu kahang chu keshü yyi wi wa kesawa sa! Nkemehai na mathu jjenku nu leben wi ben.

¹⁶Isala hi kekiqa ghena hi APVÜWA Anyiza cichi, nu ma hi hangsha cüden.

¹⁷Aghanen, aghanan lapvü nu aghaja wila ileben-nkagha kaghadhi na ma wi ki den, nu ma ihhai kina cü den.

¹⁸Ighinyithu kejon ssinu aghi wi kesali keben witsü ma hi hangsha neng senghoaben .

¹⁹Anyiza, anuphan kekhang sen ketenwa, ihhai kina cü nu mathu miwi khangyalo; kepaghenanye mathu yen tsü nkemili mvu, nu mathu na ma nmessi.

²⁰Hi kegweghe kaghawenwa na ma pvüshangthu matang; ma jüh khishikechithu tsü pakhhia.

²¹Ma jühthu tsüna adeli miwila chengche, isala ma leben wi nyu nankemeghü ketan; ma jühthu tsüna adeli na ayisü patekecca ti, isala tsüthu tsüna njünnu kedighe ti ayisü saden.

²²Ngükeccüthu tsüpi APVÜWA dhenchilo, isathu ma nsheipi yaden; ma anyi ketsatanthu yala khiela nyu ncha thsüla sa nben.

²³O Anyiza, isala nyu kepathithu, nu milikemesathu na mathu kahang pahan ketanla npi cenyala ssigho mathu shüjjen wi chicüaden, ighena tsü, hi no nondiden.