Read Northern Rengma Naga ZAKECI 60 Bible Online

ZAKECI 60 - Northern Rengma Naga bible

ZAKECI 60

¹[58] Anyiza, no ithu meya mvula nu ithu miwi khangya; no ithu miwi n-ghepvü wa— isala khilitsü kheneng ithu wi khapeghe gholo.

²No ayyi yala kedheggü thsü nu tsüla nankhia; khili mayisüwa tsü sapi mehai cülo, kepaghenanye tsüwa tsüna qanca zighedha.

³N-nyithu yala ketizensa ntsa thsüdha; ithu na adina pvü keten ti ithu len ketsen kuludha.

⁴Mathu ya keyasa wi shhuya thsüle kesalina, no npi wina ajüh pi no nyuwakü ketenthu chü thsüdha.

⁵No kekhang wina ithu hangsha yalo; ithu kekhie luneng cülo, isathu no ghali keten nyi hangshaya metsi.

⁶Anyiza na ma kekinyijjen wina khichidha, “Khangkeya wina hi Shekhem tsüpi gishü, nu Sukkoth yyiketijü tsüpi inyithu gishüaden.

⁷Gilead tsüna iji, nu Manasseh la; Efraim tsüna iliguwen nu Judah na hi kedi khhatssüwa.

⁸Isala hi Moab pi ikwen kemetsikhu saden, nu hi iccüguwen pi Edom miwi cü chiden, tsüna hi tsü nkaya kesa zensu. Filistinthu na imiwi jisha nu khangya ben le meshenben kwe?”

⁹O Anyiza, thowa na hi ssinu anyunuti khweti non wi duya mehai nu? Thowa na hi ssinu Edom wi wa nu?

¹⁰No ntsakhiwa ithu meya mvu ladha kwe? No ithu süpahizi ssinu alentsen nwadha kwe?

¹¹Aghinyithu matang nu ithu kiqa cülo; anyi kekiqa tsüna ma men nmi.

¹²Anyiza na ithu wi benthu ithu na khangyaden; ma ithu ghinyithu miwi khang yaden.