Read Northern Rengma Naga ZAKECI 66 Bible Online

ZAKECI 66 - Northern Rengma Naga bible

ZAKECI 66

¹[64] Anonkeghe wi jisha pi Anyiza senglo, anyi tsüdila!

²Ma nyankethang ghena akhwi salo; anyankethang keseng pi ma wi chilo!

³Anyiza wi khilo, “No kuli kechithu tsüna khatila amansa nu! No kekhangwa tsüna di ntsa kesalina ighinyithu na mathu messi nu ntuwi nkhwenca dua.

⁴Ayyiwi anyi tsüdila no kinyi; mathu na kesengkhwi sapi no wi chi, mathu na keseng khwithu pi n-nyan saki chi.”

⁵Anyiza na anyithu jawi amankesa mangwa kulichi theng khe gho ghangchilo.

⁶ Ma tssükedone tsüpi ayyi kekiqha sa; ithu bamyithu na alentsen sen nu aghaku pvüdhi. Ciwi ithu na ma kuli kechithu tsü ghena anonghe.

⁷Ma kekhang wina anuphanla kekhang senden, nu ma nyon pi mizzatentithu ghang ben den. Kematang nyithu thola shagha ma nshun thsüla.

⁸Ithu Nyiza senglo, mizzatentithu tsüdi; nthu kesengkhwi tsü yala zaya thsülo.

⁹Ma ithu pi hangya thsü, nu ithu pi khuli thsü nsa.

¹⁰No ithu pi ghankenan wi chidha, Anyiza; anni pi rükatssü mecang pi mehai neng kesa tsüti no ithu ghan-nandha.

¹¹No ithu yala nyu ca wi khuli du thsü, akhhi kekiyanthu pi ithu ghatsü wi chi.

¹²No ithu ghinyithu yala ithu miwi meghe thsü; ithu na anni nu atssüketi tsüdi pvüdhi, isala no khilitsü ithu ssighola apvü-nkesa pen wi chicüdha.

¹³Hi mecang pi kekinyi sen nu njjen wi ghoden; hi ijüh mangwa khishi theng khe tsüpi no kinyiden.

¹⁴Hi ketizensa keben wi hi mangwa pi no cüle khitheng khe tsüpi no cüaden.

¹⁵Kekinyipen wi tsü mecang thsüle kesalina hi khaghaneni sengho den; hi amesü süpon nu anenithu pi ahhansha sa den, nu ma nikhu tsü yala atssan wi ki thsüden.

¹⁶gho kina chilo, Anyiza nyuwa ketenthu tsüdi, isathu ma ighena mangwa kulichi khe hi pi nthu kizaden.

¹⁷Kekiqa ghena hi ma wi khiechi; hi akhwithu sapi ma seng.

¹⁸Keujüla hi hi kesami pi koghobvü lethu, APVÜWA na ihhai kina nkesa.

¹⁹Isala Anyiza na ntsakhiwa ihhai kina; nu hi kekhie ya cüdha.

²⁰Hi Anyiza seng, kepaghenanye ma hi kekhie meya mvula nsa nyelela ma hi wi ghaliki keten tsü khu nengya nsa.