Read Northern Rengma Naga ZAKECI 68 Bible Online

ZAKECI 68 - Northern Rengma Naga bible

ZAKECI 68

¹[66] Anyiza ya shagha nu ma ghinyithu jügüzighe. Ma nanmeghü ketenthu na nchala bvüa.

²Annikekhu na mo pi bvü keten tsüti, mathu jügü pi bvü thsü; anie na anni tuwi tssüghe keten ti, gheshighenathu na Anyiza tuwi dedi den.

³Isala ketsatanthu na ma ketenpen wi mathu nonghe nu kenong ghena jisha den.

⁴Anyiza wi akhwi salo, kesengkhwi sapi ma nyan sakilo; akulukeshü miwi donki nu wa ketenwa tsü ghena alen kiden-kesha chilo. Ma nyanwa tsüna APVÜWA — ma ketepen witsü nong den!

⁵Anyiza, kemetha kekinyijjen wi hangketenwa tsüna, magha-maghang nu denyilethu noncca nu khweden.

⁶Ma ajjen pi ma ketan hang ketenthu ya hangya thsüden, nu atssüzü nyithu lisha sengho nonkeghe wi chicüden, isala nyu matang ketenthu tsü kecaghang yyi wi hang thsüden.

⁷O Anyiza, na n-nyithu ssinu ayyikeshü pvüdhi kewa wi,

⁸ ayyi na kuli, akulu wi atsan na keshuchi dugho, kepaghenanye Sinai Nyizawa [67] na gho, Israel Nyizawa na kegho ghena.

⁹No atsan yala keyakishen sa gho thsü, nu ayyi kekiqha yala mehai nengya thsü;

¹⁰n-nyithu na ciwi mathu jjen sa; No kemehai wina ketha-uthu ghena la khuchi.

¹¹APVÜWA na ayen khuchi nu nzathu kejon na ajüh tsü ketsichi:

¹²“Kadimithu nu mathu süpahizi la bvü tendha!” Ajjen wi nzathu na atsanqai khukeyathu tsüpi gishüyadha:

¹³rükatssü pi nkhetsü tsiketonthu meju, mathu gisha na suna kemehai ti cwencwe. (mangkesa na aghikesa ghanan wi nthu na khaghanenithu jawi ben wa nu?)

¹⁴Kekhang ntsawa Anyiza na Zalmon Yikha wi kadimithu jügüzighe kesa wi ma aghola ya ciwi ca thsü.

¹⁵Bashan tsüna ayikha mangtila di nu, ayikha ketsu kejon keben kesü!

¹⁶mangkesa na ayikha kedi wi tsü ben, nu Anyiza na hangle kessiya kesa yikha tsü nkhichila ghang ten nu? APVÜWA na anuphanla ciwi hangden!

¹⁷APVÜWA na Sinai wina gorugari hazar kejon ssinu kemetha pen wi gho.

¹⁸ Ma atssüzü kejon ghan sen ayikha kemisi wi wa; ma nyu matang ketenthu wi aju kejon muya. APVÜWA Anyiza na ciwi hangden.

¹⁹APVÜWA senglo, ma atsathangla ithu khhi pvü ketenwa; ma ithu hangshawa Anyiza.

²⁰Ithu Nyiza ha hangsha cü ketenwa Nyiza; ma APVÜWA, ithu PVÜWA, keshü wina ithu hangsha cüden.

²¹Anyiza na ntsakhiwa ma ghinyithu kesami wi mataghang ketenthu li pakhhi cüden.

²²APVÜWA na khi, “Hi Bashan wina nthu ghinyithu ssi neng ghoden; hi atssükedone kedhu wina mathu ssinu kheneng ghoden,

²³isanu no mathu jjü miwi alentsenden, nu nthu ffü na mathu jjü kemenne mvu chu menne yaben.”

²⁴O Anyiza, no khangkeya wina alentsen kechiwa tsüna anyi tsüdila muyadha, Anyiza, hi kadimiwa na alentsen sen nu ma kekinyipen wi kewa tsü.

²⁵Akhwi kesathu na atuwa, achünong kekhouthu na asengwa, nu apha kiccü ghalathu na ma non wi.

²⁶“Ma nyithu na saghu keben wi tsü Anyiza senglo; APVÜWA senglo, nthu Jacob shicübvüghathu tsüdi!”

²⁷Benjamin shicü na atuwa gho, amizza kizza ntsawa, tsüsengwi Judah wi alikesathu na akhang gweghe, Zebulun nu Naftali wi alikesathu na mathu sennie.

²⁸No kekhang pi ccüca chilo, O Anyiza, no ithu mithon wina kekhang kesenwa tsü

²⁹Jerusalem kekinyijjen wina, kadimithu na aju sen nu no wi gho.

³⁰Ejipt, aghangsa agheja wi hang ketenwa tsü satekü chi; mizzatentithu, amesü na ma zza sisen ketenthu tsü satekü chi, mathu tsüdila ntuwi nkhwenca du, nu rükatssü pi no nkecü chu. aghikesa ghali ketenthu nyi tsü jügüzighe cülo!

³¹Mithonthu na Ejipt wina ghoden; Sudan nyithu na mathu kwen zanki, nu Anyiza wi kekhie sa den.

³²Akhwi sapi Anyiza wi chilo, ayyi wi kadiyyithu, kesengkhwi sapi APVÜWA wi chilo,

³³atssan, alamyi tssanwa miwi donki nu wa ketenwa. Ma wi kina lo, khang ntsa jisha chilo.

³⁴Anyiza kekhang tsüpi thangchilo; Ajenkeben Israel miwi ma kekhang atssan wi ben.

³⁵Israel Nyizawa! Ma kekinyijjen wina gho keten tsü ghang pi khatila messi nu! Ma kekhang nu kezü pi ma nyithu cüden. Anyiza senglo!