Read Northern Rengma Naga ZAKECI 72 Bible Online

ZAKECI 72 - Northern Rengma Naga bible

ZAKECI 72

¹[70] O Anyiza, kadimiwa sansi pi no ketsatan wi ajühkaghatenya thsülo; no kemeshonwa tsüpi ma la cülo,

²isanu ma ya kemeshon wina n-nyithu miwi kekhang senya thsülo nu ketsatan wina nyu ma nkhichi ketenthu miwi kekhang senya thsülo.

³Ayyiwa na mehai kayi wa keyawa sa; tsü ya ketsatan wi anonghe keyawa sa.

⁴Kadimiwa yala kemeshon wina ketha-u jühkaghaten; ma nkemithu kiqa nu mathu nkhichi ketenthu mi khangkeyawa sa.

⁵Aghani na wegü keben chu, asha na kewegü khuchi keben chu, nu amapi ghaketen tsüdi wila n-nyithu na no kekinyiwa sa.

⁶Kadimiwa ya alli wi atsankegho ti, atsanghozü pi ayyi ten keben ti sa keyawa sa.

⁷Ma hangkeben tsüwi ketsatan ya pongkemeni sa, nu asha na wegü keben chu mehaikayi keyawa salo.

⁸ Ma kadiyyi tsüna atssükedone kesü na wa kesü cu, Eufrat wina wala ayyi kenten la cuben.

⁹Ayyikeshü wi anyithu na ma tuwi kukedu; Ma ghinyithu na ayyi wi qanca du den.

¹⁰Spain nu ayyimangkehithu wi kadimithu na ajuthu sengho ma cüden; Sheba nu Seba [71] kadimithu na kekinyithu sengho ma cüden.

¹¹Kadimithu tsüdila ma tuwi kukedu; mizzatentithu tsüdila ma kekuli saden.

¹²Ma ketha-u ma ci kechithu hangsha yaden, nu mangla nkemithu nu nyu ma nchüla kesathu.

¹³Ma kekhang nkemi nu ketha-uthu tsü nantizen; kahhatuthu kahang hangsha cüden.

¹⁴Ma anyi na mathu kepasha nu yasayala wina mathu hangsha cüden; mathu kahangli tsüna ma tuwi ma men ben ntsa.

¹⁵Kadimiwa kesi kahangwa sa thsü! Arabia wina suna pi ma kecüwa sa thsü; matsü tsüdi wi ma ghena kekhie kesawa sa. Keshüthangla Anyiza kesawegü ma miwi ben keyawa sa!

¹⁶Ayyiwa wi asu kejon bün keyawa sa; yangdsaketenthu yala Lebanon wi kedsauthu ti yyishiphon pong keyawa sa. Alli wi aghangthu ti anyi yala anyunutithu pong keyawa sa.

¹⁷Kadimiwa nyan ya khiela mali nkeya; aghani keben chu ma nyan thang kebenwa sa. Anyiza na sawegü pi kadimiwa kecü ti mizzatentithu tsüdi ya sawegü pi mathu cülo ma wi kekhiewa sa.

¹⁸APVÜWA, Israel Nyizawa senglo! Ma ketan amankesa hathu ha kuli chile.

¹⁹Anuphan wila ma nyankethangwa tsü senglo! Ma nyankethang ya ayyi maben pong keyawa sa. Amen! Amen!

²⁰Hawa ha Jesse tsawa David kekhie sakhendha.