Read Northern Rengma Naga ZAKECI 78 Bible Online

ZAKECI 78 - Northern Rengma Naga bible

ZAKECI 78

¹[77] Kinayalo, inyithu; hi kesansijüh ha, nu hi mangwa khi khe nthu leben pi chilo.

²Hi kemetsa jühthu tsü sen nu kheni wakesa wi amankesathu tsü khi mechan-metsa chiden,

³hathu ha ithu na zaya nu chüyadha, ithu bathu na ithu wi kizadha.

⁴Ithu tsangathu wi ithu na ha pi nkhila theng nben; ithu haseng shicüthu wi APVÜWA kekhang, nu ma kekuli kedithu nu ma amankesa kulikechithu tsü pi khiden.

⁵Ma ayenthu pi Israel nyithu cü, nu ayenkhukechi pi Jacob shicübvüghathu cü. Ma ithu bamyithu yala ayenthu hapi mathu tsangathu sansilo nu kicükegwe chi,

⁶isanu ghaketen shicübvüghathu la tsü chüya nu khineng pi mathu tsangathu la kiza thsüle kesalina.

⁷Hati kesa wi ha mathu la mathu kenondi pi Anyiza miwi chi, nu ma kulikechithu tsü nmali, isala keshüthangla ma jühkhukechithu tsü nie.

⁸Mathu na mathu bamyithu, kematang, nu ajüh nkeyathu, khiela Anyiza kenondi wi nzü, nu ma wi atsentsa sa nketenthu tsüti nsadha.

⁹Efraim nyithu, alamugho nu akusü pi mathu ghe sapvü, aghikesa ghanan wi kheneng bvüa.

¹⁰Mathu na Anyiza ssinu cenkethenjüh tsü nkina; mathu na ma yenwa tsü n-nie mvu la.

¹¹Mathu na ma kulikechi, ma amankesa sa kechithu kemu tsü malia.

¹² Mathu bamyithu na ghangkeben wi, Anyiza na Ejipt yyi Zoan deshentijü wi amankesathu kuli chi.

¹³ Ma atssükedone tsü gishüzighe, nu mathu ssinu ciwi shhu; Ma atssü sa pila ajjen-keshon ti ngan thsüa.

¹⁴ Aghanan lethu akulukeshü pi mathu len tsütson, nu aghaja lethu anni kewegü pi mathu ssi.

¹⁵Ma ayyikeshü wi alonshi pakhhi chi, nu manon wina atssü lle shhugho pi mathu cü.

¹⁶Ma alonshi wina aghaku ceng shhugho yathsü, nu atssü yala aghaku ti lle wa thsüa.

¹⁷Isala mathu na sami kayi pi Anyiza shun, nu ayyikeshü wi Kemisintsawa tsü matang.

¹⁸ Mathu aghandu Anyiza ghan-nan le mathu kedsa mvu tsse tsü khie.

¹⁹Mathu Anyiza matang nu khi, “Anyiza na ayyikeshü wi atsse pi ithu cüya mehai kwe?

²⁰Ma alon kihhechi nu atssü lle keshhugho tsüna ntsakhiwa le, isala ma amesa nu asa pi ma nyithu cüya mehai kwe?

²¹Tsalina mathu wi tsü zakeya wi APVÜWA na ma lebentsu ntsa sa; ma anni pi mathu ssikaghashen, nu ma lebenketsu mathu kematangwa tsüna jikayi shagha,

²²kepaghenanye mathu na ma miwi kenondi nmi, nu ma mathu hangshaya benle kesa n-nondi.

²³Isala ma tang atssan ya ma jenka sha chilo ajühkhuchi;

²⁴ ma tangwi na asu pi mathu cü, mathu yala dsalo manna kesunsha chi.

²⁵Tsalina mathu na tang nyilothu tsse dsa, nu Anyiza na mathu kenmvu tsüdi pi mathu cüa.

²⁶Ma nishuwa meghü tsü ya sho thsü, nu ma kekhang wina ma acülawa meghü tsü la pakethu chi;

²⁷nu ma aghaku ghüsa wi ahachan keji tsüti, awa kesunsha pi ma nyithu cü;

²⁸tsüthu tsüna mathu nithsüjjen kevü tsüdi wi qanca dugho.

²⁹Tsalina anyithu na dsaya nu mathu pvü nmaya; Anyiza na mathu kenmvu tsüpi mathu kecü ghena.

³⁰Isala mathu pvükemene ghena dsa lela anonkwen meya nu dsatu ben meshü,

³¹Anyiza na mathu miwi lebentsuya, nu mathu jawi kezü ntsathu pathia, Israel jawi kepvünyi kemehai ntsathu tsü.

³²Hati kesa wi la anyithu na sami; ma amankesa kulichi lela mathu ma n-nondi.

³³Tsalina ma mathu tsathang yala ahatha kekissa ti ma sakhen sathsüa nu mathu kahang ya zulila dedi thsüa.

³⁴Khathansha ma mathu jawi pahan pathi lakhe, kepathu na ma wi kheneng gho mathu lebenkhapeghe, nu mathu leben ntsa sa ma wi kekhiesa.

³⁵Anyiza na mathu kekhwewa, nu Kekhang ntsawa na mathu kiqa ghole kesa meshenya.

³⁶Isala mathu jühthu tsüdila milikemesa; mathu kekhithu kesütanla atsentsa nye.

³⁷ Mathu na ma jüh meya; cenkethenjüh wi tsü atsentsa nsen.

³⁸Isala Anyiza na ma nyithu nantizen chi. Ma mathu kesami teshi cü nu mathu yasa nsa. Matsü kejon wi ma aghekepvü kekheneng, nu ma lebenketsu zan neng.

³⁹Mathu na shü wa keten nyile, nu ameghü na sho pvü keten ti kesale meshenya.

⁴⁰Mathu na ayyikeshü wi khaju tughu ma matang; mang khaju tughu ma sapi ma hathana thsü nu!

⁴¹Mathu na Anyiza pi ghankenan wi chila chineng, nu kinaa sengho kemethawa Israel Nyiza miwi chi.

⁴²Mathu na ma kekhang kedi nu ma mathu ghinyithu kwen wina mathu hangsha kecü tsathangwa tsü malia,

⁴³nu Ejipt yyi wi Zoan deshentijü wi kekuli keti, nu amankesa kuli kechithu tsü malia.

⁴⁴Ma aghaku tssü pi ajjü ceng, nu Ejipt nyithu na atssü jjüle kesa la nmula.

⁴⁵Ma panzüponathu tsü kesun pi mathu meten-mesha thsü, nu akanqae ya mathu yyi yasa thsüa.

⁴⁶Ma ashiqathu kesun pi mathu yangdsaketenthu dsa thsüa nu mathu llithu yasa thsüa.

⁴⁷Ma aghayi pi mathu kemeshentsse tonthu yasa thsüa, nu akejan yala mathu khhaghabvü tonthu yasa thsüa.

⁴⁸Ma aghayi pi mathu mesüsithu kecenthi thsüa, nu atsanphagha ya mathu nenithu yasa thsüa.

⁴⁹Ma ma lebenketsu nu ma ghekepvü na keshü ketsikinathu ti keshusha kechi wi mathu sapi ketizensa ntsa sa thsüa.

⁵⁰Ma ma lebenketsu nkekheneng nyelela mathu kahanglithu la nhiesha, isala adhagha pi mathu pathi khia.

⁵¹ Ma Ejipt wi atheghi tsüdi wi atsa tssütsewa tsüdila pathi khia.

⁵² Isanu ma anenikehiewa ti ma nyithu ssi nu alentsen shhu, nu ayyikeshü wi mathu len tsütson.

⁵³ Ma yazishu nu mathu ssi, nu mathu mangla nmessi; isala atssükedone na ma ghinyithu menyanbhon.

⁵⁴ Ma mathu ssinu ma nkakeya yyi kemetha yikhathu wi tsü gho.

⁵⁵ Ma nyithu na atujügüwathu ma ayyi ciwi kahangthu tsüdila jügüa. Ma mathu yyithu tsüpi Israel mizzathu gishü cü, nu mathu jjenthu tsüpi ma nyithu cüa.

⁵⁶ Isala mathu na Kekhang ntsawa Anyiza matang, nu ma pi ghankenan wi chi. Mathu na ma jühkhukechithu tsü nkina .

⁵⁷Isala mathu bamyithu ti kematang, nu ajüh nkeya kekuli sa, kenondi qo nkemi alakusü kefü tsüti.

⁵⁸Mathu na Anyiza nkechü kekinyijjenthu tsü sapi ma ya aghepvü thsüa, nu atsikezhüthu tsü ghena ma sapi lebentsu thsüa.

⁵⁹Anyiza na tsü mu keya wi ma lebentsu, tsüghena ma ma nyithu teshitha sa.

⁶⁰ Ma Shilo[78] wi ma nithsüjjenwa tsü teshia, ma ithu jawi kahang jjenwa tsü.

⁶¹Ma ithu ghinyithu yala cenkethenjüh khitson, ma kekhang nu ma nyankethang mechantsi tsü khuya thsüa.

⁶²Ma ma nyithu miwi aghepvü, nu mathu ghinyithu yala mathu pathi thsüa.

⁶³Npvüza cahlithu aghi wi pathia, nu nza cahlithu na mathu wuba kesanyi mu meyala.

⁶⁴Keqhaikedithu na yasayala wi shükhia, nu mathu wubvüthu ya mathu nqaiki thsüla.

⁶⁵Asakhen wi APVÜWA na jenkeben wina keshagha ti; ma anyi kezüwa na kisengtssü jjü pi ma mmi jeng pvü keben ti sa.

⁶⁶Ma ma ghinyithu pasha pi shagha nkeya sa kejügheyala jügü pi bvü neng thsüa.

⁶⁷Isala ma Josef shicübvüghathu meya mvu; ma Efraim mizza kessi meya la.

⁶⁸Ma Judah mizza nu Zion yikha ma kenen ntsawa tsü kessiya.

⁶⁹Tang wi ma jjen ti kesa ma kekinyijjen saya; ma tsüwa tsü pila ayyi ti zükeqhe matsü tsüdi wi ngan benya thsü.

⁷⁰ Ma ma maghawa David kessiya; Ma amou wina ma ssigho,

⁷¹ciwi ma ma nenithu hie, nu ma pi Israel kadimiwa sa thsü, Anyiza nyithu kehiewa.

⁷²David na ma ketanla ma shie nmeshenla tsüthu tsü noncca, nu sachü ntsa sanu ma nyi lentsütson.”