Read Northern Rengma Naga ZAKECI 79 Bible Online

ZAKECI 79 - Northern Rengma Naga bible

ZAKECI 79

¹[79] O Anyiza, no nkechüthu na n-yyiwa tsü yayadha le. Mathu no kekinyijjen kemethawa tsü nakhi, nu Jerusalem tsü la yasadha.

²Mathu na n-nyithu kamang tsü teshi pi akamang-kemcüwathu cüdha, nmaghathu kamang tsü pi aghangsathu yala dsa thsüdha.

³Mathu na n-nyithu jjü tsü yala atssü ti keji thsüa; Jerusalem tsüdi wila lle wa, nu thola mathu pi kevhü nyi nmi.

⁴Aketekevü keben mizzatentithu na ithu nkekhichi sa; mathu na ithu nankeqhe nu kimenni.

⁵APVÜWA, no anuphan ithu miwi aghepvü ben ten kwe? Nlebenketsu tsü yala n-nganla anni ti mecang ben thsü ten kwe?

⁶Nlebenketsu tsü ya khapeghe sen nu mizzatenti no kinyi nketenthu, nu no wi khie nketenthu miwi walo.

⁷Kepaghenanye mathu na n-nyithu pathi theng; mathu na no kadiyyi yasadha.

⁸Ithu bamyithu kesami ghena ithu nmeten-mesha lalo. Khilitsü ithu nantizen chilo; ithu kaghang tsüdila bhataghadha.

⁹Ithu kiqa cülo, O Anyiza, nu ithu hangsha cülo. No ketanla n-nyan kenyuwakü ghena ithu hangsha cü, nu kesamithu teshi pi ithu cülo.

¹⁰Mangsale mizzatentithu yala, “Nthu Nyiza na khiewa ben nu?” isa keü thsü nu? Nmaghathu jjü kekiji tsü ghena ithu yala no mizzatentithu kemeten-mesha tsü muya thsülo.

¹¹Atssüzüthu kaghadhi hhai kina chilo, nu no kekhang kedi wina meshensa pi shü thsüle kebenthu tsü lishachi cülo.

¹²APVÜWA, mizzatenti kepathu na no nkhichi kesa ghena tsü miwi tagü tughu sapi mathu cülo.

¹³Isalethu ithu n-nyithu, no khaghanenithu na anuphanla no nkesengcha sa den, nu matsü ghaketen tsüdi wi no sengden.