Read Northern Rengma Naga ZAKECI 81 Bible Online

ZAKECI 81 - Northern Rengma Naga bible

ZAKECI 81

¹[81] Ithu sheikepiwa Anyiza wi anonkeghe ghena jishalo; akhwi sapi Jacob Nyizawa sakilo!

²Akhwi saya nu apha tsü kihhe yalo; Harp nu Lair pi akhwi kemehai sa chilo.

³ Akho tsü ghena tutuwa khou chilo, asha kaghani nu asha kepong tsüdi wi.

⁴Hawa ha Israel ghena ayenwa, Jacob Nyiza na ahza khukechiwa tsü.

⁵Ma Ejipt yyi ssikekaghashen wi hawa ha pi Israel nyithu cü. Hi ahhai nkechü kesü na hati khi keben zaya,

⁶“Hi nghatsü wi akhhithu tsü pisha; hi no ya yimecanglon pvü keten khhi tsü pisha thsüa.

⁷ No agükeccü wi keben wi, no hi cichi, nu hi no hangsha cü. Hi kekuthipen caghamo wina, hi no luneng chi. Hi Mariba tssükebvüpen wi no ghan-nan.

⁸Kinalo, inyithu, hi npi wina nthu kiza keben ha; Israel, nthu ijühkina lethu hi khatila hi nenten nu!

⁹ Nthu acenpvü kepa wi kinyi yishü khang.

¹⁰Hi APVÜWA nthu Nyiza, Ejipt wina nthu ssi keshhughowa tsü. Nthu pang ka chilo, isathu hi nthu ghanja cüden.

¹¹‘Isala inyithu na ijüh nkina; Israel na ijüh nkina .

¹²Tsalina hi mathu ya mathu kaghazü len wi tsü wa thsü, mathu kesa mvuthu tsü sa thsüa.

¹³Inyithu ya ijüh kina yalo kheshülan; mathu ijüh nieyalo kheshülan!

¹⁴Hi wan nu mathu ghinyithu pasha, nu mathu nkenanmvuthu tsüdila yasa cü kesa.

¹⁵Hi n-ghangmvu ketenthu na ituwi mathu khutsüdu kesa; mathu kemetenwa tsüna anuphan ben kesa.

¹⁶Isanu awhengsu kemehai ntsawa pi nthu ghanja, nu agheja wi anikholi pi nthu nonkwenya thsükesa.’