Read Northern Rengma Naga ZAKECI 85 Bible Online

ZAKECI 85 - Northern Rengma Naga bible

ZAKECI 85

¹[85] APVÜWA, no n-yyiwa tsü tizen gho; no Israel sapi mehai nengya thsü.

²No n-nyithu kesami nu mathu kesazzithu tsüdi teshi cüdha.

³No mathu miwi aghe-npvüla nu nlebenketsu tsü zan neng ya.

⁴Ithu ssinu kheneng gholo, O Anyiza ithu hangshawa, nu ithu miwi no n-nen keben tsü teshilo!

⁵No anuphan ithu miwi aghepvü ten kwe? N-ghekepvü tsü khiela teshi nten kwe?

⁶Ithu sapi zü neng cülo, isathu ithu, n-nyithu, no sengden.

⁷No ghaliki keten tsü pi ithu ccüca chilo, O APVÜWA, nu no hangshakeya kekiqa pi ithu cülo.

⁸Hi, APVÜWA Anyiza na khi keben tsü kina ben; ma kecca pi ithu ma nyithu cüle khishichi, keujüla ithu na ithu kejüphon len wi tsü nwa nengla lethu.

⁹Ntsakhiwa ma ma nyuwakü ketenthu tsü hangsha cüle kiden ben, nu ma hangsha cü ketenwa tsüna ithu yyi wi ben den.

¹⁰Kaghali nu atsentsawa manyi kemetuli yaden; ketsatan nu keccawa manyi khünketegüli den.

¹¹Anyi jühkeyawa tsüna ayyi wina kiden, nu Anyiza ketsatanwa tsüna tang wina dugho den.

¹²APVÜWA na ithu sapi mehai kayi, nu ithu yyi yala aghasukaghawa saya thsüden.

¹³Ketsatanwa tsüna APVÜWA tuwi wa, nu ma ghena alen kiden pi cüden.