Read Northern Rengma Naga ZAKECI 86 Bible Online

ZAKECI 86 - Northern Rengma Naga bible

ZAKECI 86

¹[86] APVÜWA, ihhai kina nu luneng chilo, kepaghenanye hi kekiqa nmi, nu hi nkhangladha.

²Keshü wina hi hangsha cülo, kepaghenanye hi njüh yaden; hi hangsha cülo, kepaghenanye hi nmaghawa nu no nondiden.

³No iNyiza, tsalina hi nantizen cülo; hi ghanan thangthang no wi khie.

⁴Nmaghawa sapi nong cülo, O APVÜWA, kepaghenanye hi kekhie na no wi gighoben.

⁵No ithu tuwi mehai nu kesami teshi cüden, no wi khie ketenthu ghena tsü ghaliki keten na pongben.

⁶APVÜWA, hi kekhie ha kina cülo; kekiqa ghena hi kiqai ha kina chilo.

⁷Agükeccü tsüwi hi no cichi, kepaghenanye no hi kekhie luneng cüden.

⁸No ti kesa Anyiza kepa wi nmi, O APVÜWA, thola no kuli kechi tsüti npi sachi.

⁹ No sakechi mizzatentithu tsüdi ntuwi kukedu; mathu na no kedi tsü sengden.

¹⁰No khang ntsa nu amankesathu kuliden; no ketan Anyiza le.

¹¹Hi sansi cülo APVÜWA, hi ya mangwa kuli thsü mvu ben khe, hi atsentsa wina njühkina den; hi ya ileben tsüdi pi no kekuli sa thsü le kesalina hi sansi cülo.

¹²Hi ileben tsüdi pi no seng tenle, O APVÜWA iNyiza; hi anuphanla no kedi tsüpi thangchiden.

¹³No ghaliki ketenwa tsüna ighena khatila di nu! No ashüjjen wina hi hangsha cüdha.

¹⁴Anyi kekapvüthu na hi shunle gho tendha, O Anyiza; anyi kedaggü akhang kesü na hi pathia le kiden bendha, anyi tsüthu na aleben pi no cü nten.

¹⁵Isala, O APVÜWA, no nanketizen kaghali Nyiza le, keshüthangla lebensie, ccatssü nu atsentsa saden.

¹⁶Kheneng gho hi nantizen cülo; hi satezü nu hangsha cülo, kepaghenanye ijja na no kekuli kesa ti hi la no kekuli sale.

¹⁷No mehaile kesa pi hi chü thsülo, APVÜWA; hi n-ghangmvu ketenthu na no alebenkecca, nu kekiqa pi hi kecü mukeya wi mathu ya kejügheya thsülo.