Read Northern Rengma Naga ZAKECI 88 Bible Online

ZAKECI 88 - Northern Rengma Naga bible

ZAKECI 88

¹[88] APVÜWA Anyiza, hi hangshawa, hi ghanan thangthang qai, aghaja wi ntuwi gho.

²Hi kekhie kina cülo; kekiqa ghena hi kiqai ha kina cülo!

³Agükeccü kejon na imiwi dughodha, nu hi keshü tetsakidha.

⁴Hi anyi kepathu na shüle keben tsüti; hi kezü tsüdila bvüdha.

⁵Keshüthu jawi hi teshi chidha; hi pathi pi ashüjjen wi chi kesathu ti. No mathu malidha nu no mathu kiqakeya nkemithu tsüti sadha.

⁶No hi pi ashüjjen kedhu wi chi, kejang ntsa nu kedhu ntsa ayyiku wi chidha.

⁷N-ghekepvü tsüna kiyankegü imiwi bendha, nu tsü hatha kekhu wi tsü hi pachadha.

⁸No ipvüshangthu ya hi teshi thsüa; nu no hi pi mathu tuwi nanmeghüthi kesa kesü sa thsüdha. Ma non wi hi shanbhon nu bvü meyadha;

⁹ketizenkesa wina inyon la kekhang nmi ladha. APVÜWA, hi atsathang no ci, nu ikwen zanki pi no wi kekhie sa.

¹⁰Keshüthu ghena no amankesa kuli chiten kwe? Mathu shagha no sengya ben kwe?

¹¹No ghaliki keten tsüpi ashüjjen wi khi nyelela no wi atsentsa tsüpi keyasa pen wi khiya ben kwe?

¹²No amankesa kekulithu tsü kejang pen wi nyelela no kemehaiwa tsüna mali kesathu yyi wi muya ben kwe?

¹³APVÜWA, kekiqa ghena hi no ci; ghanan kaghapen hi no wi khie.

¹⁴Mangkesa na hi meya mvu ben nu, APVÜWA? Mangkesa na hi wina kheneng bvüdha nu?

¹⁵Hi ghanyi wina ketizensa gho nu keshü tetsakia; no kemeten khhi kekiyan ghena hi nchaladha.

¹⁶Nleben keminu tsüna hi pacha; no hi kematang tsüna hi yasa.

¹⁷Ghanan thangthang mathu na atssü keti ti hi vü; nu mathu na hi vüthaya.

¹⁸No ipvüshang ghatsan ntsawa tsü la ya hi teshi thsüa, nu kejang ketan hi ssinu gweghe wadha.