Read Northern Rengma Naga ZAKECI 91 Bible Online

ZAKECI 91 - Northern Rengma Naga bible

ZAKECI 91

¹Anyithu thowa na APVÜWA wi keyazi muya le wa, anyi thowa na Kekhang ntsawa kekhu wi khwe benya lakhe,

²ma wi hati khiya mehai, “No isheikepiwa nu hi kekhwewa. No iNyiza; hi no nondiden.”

³Ma kekuthi kemessithu tsüdi wina, nu shüya kemehai kesakinaa tsüdi wina no hangsha cüden.

⁴Ma ma gisha pi no whengya den; ma kenoncca witsü no yazishu benya den; ma tsentsawa tsüna no khwe nu nsheipi yaden.

⁵No aghaja wi kemessi kegho nyelela aghanan wi zuli kematang kegho

⁶nyelela kejang wi adhagha kegho nyelela aghanan kewegü wi nkemehai nyu pathi keten kegho tsüthu tsüdi wi nmessila mehai.

⁷Hazar kesü nkete wi khuli nu shüya mehai, hazar tagha no vü benlaya mehai, isala no patenaya nben.

⁸Anyi gheshighenathu tsüpi khati meten-meshaten khe no ghang nu muden.

⁹No APVÜWA pi nsheikepiwa sayadha, Kemisintsawa na no kekhwewa,

¹⁰tsalina keyasa na no kidhenya nben, yasayala na njjen kete wi ghoya nben.

¹¹ APVÜWA na ma nyilothu pi no nonccaya thsüaden, no khiewa wa khe no khweya thsüale kesalina.

¹² Alonthu ya nccü npatena thsüle kesalina mathu kwen pi no ghati yaden.

¹³ No ssensitemithu nu amaghangthu, ssensitemi ghekinathu nu amaghang yen nkemehaithu tsü cüten den.

¹⁴Anyiza na khi, “Hi ghali ketenthu hi mathu hangsha yaden, nu hi pi APVÜWA le chüya ketenthu tsü khwe yaden.

¹⁵Mathu na hi ci kechi wi hi mathu luneng chiden; mathu na agüccü keben wi hi mathu ssiden. Hi mathu hangsha nu nyuwakü cüden.

¹⁶Hi kesie kahang pi mathu kutimen sa cüden; hi mathu hangsha cüden.”