Read Northern Rengma Naga ZAKECI 94 Bible Online

ZAKECI 94 - Northern Rengma Naga bible

ZAKECI 94

¹APVÜWA, no ajukhiya keten Nyiza kesü; ajukhiya keten Nyiza, wegüchilo!

²No ayyi tsüdi jühkaghaten ketenwa; shagha mangwa pi kekapvüthu kecü-u khe pi mathu cülo!

³Matsü khathu anyi gheshighenawa ya nongben thsü ten nu? khathu nu, APVÜWA?

⁴Khathu ayen kepazzithu ya kapvü, nu mathu ayen kepazzi tsüpi awisa ben thsü ten nu?

⁵Mathu na n-nyithu pacha, APVÜWA; mathu na n-nyithu tsü pasha.

⁶Mathu na denyilethu, nu magha-maghangthu tsü pathi, nu kijünyi ithu yyi wi kahangthu tsü la pathiden.

⁷Mathu na khi, “APVÜWA na ithu nmu; Israel Nyizawa na hathu ha nchü.”

⁸Inyithu, nthu khatila jüphon ben nu? Nthu na khathansha wi chüya ten nu?

⁹Anyiza na ithu khuna sachi— ma zaya nben kwe? Ma ithu nyon la sachi— ma muya nben kwe?

¹⁰Ma mizzatentithu kha chi— ma mathu meten cüya nben kwe? Ma anyi tsüdi kesansiwa— ma kechü nmi kwe?

¹¹ Mathu mangwa meshenben khe APVÜWA no chüben; mathu kemeshen tsüna khatila ma jjügi nmi khe ma chüben.

¹²APVÜWA, no kicükegwe keten nyi na khatila anonghe, nu no n-yen pi ma sansi ketenwa tsü!

¹³Ayyiku kesü chhü pi gheshighenawa npi yakeya chu no agükeccü tsathangthu wi tsü mnankeya pi ma cülo.

¹⁴APVÜWA na ma nyithu teshi nten; ma ma jithu tsü yisha nten.

¹⁵Ajühkekaghakhi penthu wi tsü atsentsa tsü mu neng yaden, nu anyi ketsatanthu tsüdila tsü kiqaden.

¹⁶Thowa na ighena shagha gheshighenawa matang nu? Thowa na nkemehai kekulithu kematang wi tsü isheipi nu?

¹⁷Keujüla APVÜWA na hi kiqa ncü lethu, hi wan nu ceen kesa yyi wi tsü wa kesa.

¹⁸Hi khi, “Hi khuli bvü tendha; ” isala no ghaliki ketenwa tsüna hi ghatiya, O APVÜWA .

¹⁹Khathansha wi hi ileben güccü ihathana khe, no hi sapi inonkwen nu nongya thsü den.

²⁰No nketsatan pendhethu tsü ssinu mangla kuli nten, nketsatan yenwa cüh ketenthu,

²¹anyi kemehaithu kematang cho kiden, nu ma kesazzi nkemithu meshensa pi shü thsü ketenthu tsü.

²²Isala APVÜWA na isheipi den; iNyiza na hi khwe den.

²³Ma mathu gheshighena ghena meten cü, nu mathu kesamithu ghena mathu yasa cüden; APVÜWA ithu Nyiza na mathu yasa cüden.