Read Northern Rengma Naga KEMETSAJÜH 11 Bible Online

KEMETSAJÜH 11 - Northern Rengma Naga bible

KEMETSAJÜH 11

¹APVÜWA na kewhuchan nkemece sen ketenthu nanmeghüden. Ma kewhu tsentsa tsü ma nenden.

²Anyithu thowa na kapvü ten khe wan kejüghe yaden. Maghanen kesawa tsüna metsa kayi.

³Keujüla no mehai lethu, atsentsawa tsüna nlen tsütson den. Nondikeya nkemi nyithu na mathu nketsatan ketanla mathu yasa den.

⁴Keben tsüna no keshü kemetu ghanan wi nghena kemehai mangla saya nben, isala atsentsa tsüna no kahangli hangshaya mehai.

⁵Atsentsa tsüna anyi kemehaiwa kahang sapi yazi kayi cüden, isala gheshighenawa na ma ketanla ma kepasha kuliden.

⁶Ketsatanwa tsüna atsentsa nyi hangsha den, isala nondikeya nkemi nyi kesüwa tsü ma ketanla ma pvükemene wi ma yaya den.

⁷Gheshighena nyiwa na keshü wi ma kaghangwa tsü la ma gweghe shüden. Kenondi pi keben miwi chi keten tsüna kaghacang saaben.

⁸Ketsatanthu agükeccü wina khweya den; isala tsüna gheshighenathu miwi ghoden.

⁹Anyiza nkechüthu jüh tsüna no yasaya mehai, isala ketsatanthu kemetsa tsüna no hangshaya mehai.

¹⁰Atsentsa nyithu acenpvü mehai keya wi anyunutiwa na anonghe den, nu khathansha wi gheshighenathu na shü lakhe anonkeghe kejisha na ciwi ben den.

¹¹Khathansha wi ketsatanthu na sawegü chi khe anyunutiwa nyanthang yaden; isala gheshighenathu jüh ghena anyunutiwa tsü dedi thsüden.

¹²Nyu nkhichitha ajüh kekhi tsüna kejüphon. Keujüla no meju-mejü ten lethu no ccen ben den.

¹³Ajühjügha khi ketenwa thola kekuthi jüh kesüla pi ma nondiya nben, isala no kenondi pi kenondi qowa miwi chiya mehai.

¹⁴Keujüla mizzatenti kesü na ma lenketsütson nmi lethu qanca den. Kesansinyi kejon keben wi apvükesa nmi.

¹⁵Keujüla no nkechü nyiwa menkepvü tsü dhiale khishi lethu no nsen meshen nengden. Ciwi nkesaghuwa nghena mehai.

¹⁶Nanketizen nzawa nyu ma küden, isala ma kemehai nkemi nzawa tsü kejüghe keya kesü. Kenontssüwa khiela apisa benya nben, isala aghechen sa ketenwa na ben yaden.

¹⁷No ccatssü keben wi no kenenwa saden. Keujüla no n-ghe nmehai lethu no ketanla no patena den.

¹⁸Gheshighena nyithu na ntsakhiwa mangla kiyiya nten, isala no kemeshon saten lethu nkutimen sacü metsi.

¹⁹Anyi thowa na ketsatanwa sale meshen khvuten khe hang yaden, isala anyi thowa na kepazzi kekuli tsü sale khvu saten khe shüden.

²⁰Apvüwa na leben nkemehai nyi nanmeghüden, isala kemeshon kuli keten nyi ghaliden.

²¹Nkemehai nyi na kemeten muyaten kesa no chüti, isala ketsatanwa tsü tsü ghü bvü yaden.

²²Atsikemehai nza kesü na kemehai-keteshi kessi nkeya tsüna suna qei kesü pi avü mitsan wi chi ketheng ti kesa.

²³Kemehai nyi kenmvuwa tsüna keshüthangla kemehai shhugho den; khathansha wi gheshighenathu na mathu kenmvu muya khe anyi tsüdila alebentsu den.

²⁴Anyi pahan na mohho ntsa pisa sen, isala ben kayi den. Pahan na cügü-cügwe ntsa, isala hhatu kayi den.

²⁵Mohholo, isathu no ben kayi yaden. Nyu kiqalo, isathu nyu no kiqa cüben.

²⁶Asu pi theng nu ma men jikayi kesa hie ketenwa tsü nyu ma kishencüben, isala tsüpi jeü chi ketenwa nyu ma seng den.

²⁷Keujüla no kemehai ghang lethu nyu no küben, isala no kekivvü ghang lethu tsüwa tsü nmiwi ghoden.

²⁸Thowa na ma keben-keyeng nondi ten khe pathsü wi aghangwa kekishu ti saaden, isala ketsatanwa mehai kayi pi mazu wi aghang keshigü tsüti saaden.

²⁹Anyi agükeccü sengho ma theghi miwi chi ketenwa asakhen wi mangla nmilaben. Kejüphonthu na keshüthangla kemetsathu magha saden.

³⁰Ketsatan tsüna kahang khuchi, isala yasayalawa na tsü khusen bvü den.

³¹ Thowa na mehai khe ayyi hawi akutimen muyaden, tsalina gheshighena nu kesami nyithu meten-meshaten kesa chütiya mehai.