Read Northern Rengma Naga KEMETSAJÜH 12 Bible Online

KEMETSAJÜH 12 - Northern Rengma Naga bible

KEMETSAJÜH 12

¹Anyi thowa na palakechü ghali ten khe nyu ma kesazzi khipi ma kekiza tsü nmvuden. Satekemeshon nanmeghü keten tsüna kejüphon.

²APVÜWA na kemehai nyithu tsü nenden, isala nkemehai cho kiden ketenthu meshensa den.

³Gheshighenawa na apvü-nkesa khuchi nten, isala ketsatanthu zükeqhe ngan yaden.

⁴Awubvü kemehaiwa tsüna ma wuba mmi kesa nu nonkeghewa; isala awubvü thowa na kejüghe keya sengho ma wuba cüten khe tsüna agükedsakenaa ti kesa.

⁵Atsentsa nyithu na kemeshon wina no nanden; gheshighenawa tsü no mechu mvu keten ketan.

⁶Gheshighena nyithu jüh tsüna nyu kepathi, isala ketsatanthu jüh tsü pateqhe kethengthu kekasha cüden.

⁷Anyi gheshighenathu na mathu kededi muya nu ashicübvügha nmiladen, isala ketsatanthu theghi tsü hang wa yaben.

⁸Keujüla no meghe-metsa lethu nyu no sengden; keujüla no jüphon lethu anyithu no nkhichi laden.

⁹Ghama nu kedi kekuli kesü sa keten miwi anyi jümu sala bhalipili dsa ketenwa mehai.

¹⁰Anyi kemehaiwa na ma sahangthu nonccaden, isala gheshighena nyithu tsü tsüthu tuwi daggü den.

¹¹Aghechen sa allica ketenwa kedsakejjü meshhumena saden, isala ma men nkemi wi matsü tsüdi yasa ketenwa na kejüphon.

¹²Gheshighena nyithu kenmvuwa tsü pala nkemehai bhaya nu kuliden, isala ketsatanthu zükeqhe nganya den.

¹³Gheshighena nyiwa na ma jühthu ketanla ma yaya, isala atsentsa nyiwa na ma ketanla agükeccü wina shhu yaden.

¹⁴Nkutimen tsüna no mangwa khi nu saten khe tsü qei wi; no mangwa muya qo khe muyaden.

¹⁵Kejüphon nyithu na keshüthangla mathu meshon le kesa meshen den. Kemetsa nyithu na nyu ma kesansijüh kinaden.

¹⁶Khathansha wi kejüphonwa aghepvüya khe ma kaghaji nu pi nyu chü thsüden. Mejumejü keten nyithu na nyu ma kekimenni tsü khichi nten.

¹⁷No atsentsa kekhi wi kemeshonwa tsü kulidha, isala milikemesa tsü ssi wa nkemeshon wi chi cüden.

¹⁸Kemeshen nkemi jüh tsüna njünnu ti ayisü kedhu saya mehai, isala metsashhu kekhi jüh tsüna no sapi mehaiya mehai.

¹⁹Milikemesa tsüna kahangli kemelu kesü, isala atsentsa tsüna anuphan hang den.

²⁰Nkemehai cho kiden ketenthu leben wi nyu kemechu ben, isala thowa na kemehaiwa kuliten khe anonkeghe muya den.

²¹Ketsatan nyithu miwi nkemehai mangla sa nten, isala gheshighenawa tsü agükeccü ketan.

²²Apvüwa na milikemesathu nanmeghüden, isala ma jüh nie ketenthu nenden.

²³Mejumejü keten nyithu na mathu chü kebenwa ghena ccen ben den, isala kejüphonwa na ma nkechü pi nyu ccücaden.

²⁴Apiketsü sa kekuli tsüna kekhang pi no cüden; nontssü keten tsüna no sapi nssümagha sa cüden.

²⁵Aleben gükeccü tsüna n-nonkeghe ghanfüya mehai, isala keccaketssü jüh tsüna no sapi n-nonghe cüden.

²⁶Anyi ketsatanwa tsüna ma pvüshangwa len ketsütson kesü, isala gheshighenawa len na mathu ssi wa alen cüzzi den.

²⁷Keujüla no nontssü lethu no khiela bha ketenwa tsü muya nben, isala no apitsü ten lethu no acenpvü kemehai kesü muyaden.

²⁸Ketsatan lenwa tsüna kahang; isala gheshighena lenwa tsü keshü.