Read Northern Rengma Naga KEMETSAJÜH 14 Bible Online

KEMETSAJÜH 14 - Northern Rengma Naga bible

KEMETSAJÜH 14

¹Ajjenku tsüna nza kemetsa wina sayaden, isala kejüphon ghena tsü yasaden.

²Atsentsa senlo isathu no Apvüwa nyuwakekü pi ccüca ben; atsentsa nsenla, isalethu no tsü nsale kesa pi ccüca bendha.

³Kejüphonwa ma kekapvü na ma sapi ajüh kejon khi thsüden; kemetsa nyiwa jühthu na ma khweyaden.

⁴Allikeca mesü süpon nmi lethu nsabe ghacang den, isala tsüthu benthu asu na tsü pong yaden.

⁵Kenondi qo chüzawa na keshüthangla atsentsa khiden, isala nkenondi qowa tsüna milikemesa ketan.

⁶Dithang keten nyi khiela metsaya nben, isala meghe-metsa keten nyi na lekete chüyaden.

⁷Kejüphonthu ssinu temeja ya; mathu pi no sansi kecü mangla nmi.

⁸Mangkesa na acho kemehaiwa tsüna metsa nu? Kepaghenanye ma mangwa nsathu yishü khe tsü chüben. Mangkesa na kejüphonwa tsüna jüphon nu? Kepaghenanye ma chü ben le kesa ketan meshen den.

⁹Kejüphonthu na sami lela mangla apvüsa nten, isala kemehai nyithu na kesami teshi kecü yamvu den.

¹⁰N-nonkeghe tsüna nji ketan; nleben kinaa tsü la nji ketan. Thola tsüthu pi no gweghe gishü meya cha.

¹¹Kemehai nyiwa jjen na nkemehai nyiwa jjen keyasa sengwi lela ngan ben den.

¹² No kemeshon len le meshen ketenwa tsü no ssi wa keshü wi chicüla nchü.

¹³Kekiqhe tsüna ahathakinawa tsü kuthi cüya mehai. Anonkeghe kebvü sengwi leben gükeccü na keshüthangla ben den.

¹⁴Nkemehai nyithu na mathu mangwa ya qo khe muyaden. Kemehai nyithu na mathu kekuli ghena akutimen muyaden.

¹⁵Kejüphonwa na pala tsüdi nondiden; mejumejü ketenthu na mathu cükha ghangden.

¹⁶Kemetsa nyithu na agükeccü wina shhuya le kidenden, isala kejüphon nyithu na nkiden-kesha nu kaghaji mtsü kuliden.

¹⁷Leben ketsu nyi na kejüphon kekuli saden; kemetsa nyi na ceen ben den.

¹⁸Nkechü nyi na mathu kejüphon ghena mangwa muya qo khe muya den, isala acho kemehaithu na palakechü pi mathu kutimen sa cüden.

¹⁹Nkemehai nyi na ketsatanwa tuwi kukedu mathu kenen khieden.

²⁰Thola ma jenphon lela ketha-uwa tsü nen nten, isala kebanwa na ma pvüshang kejon ben den.

²¹Keujüla no anonghe yamvuthu ketha-uthu tuwi ccatssülo; nyu nkhichi kesa tsüna kesami.

²²Keujüla no kemehaiwa kuli lethu nyu kenondi kekü melli yaden; keujüla no nkemehai kuliten lethu no sazzi bendha.

²³Kulilo isathu no kahang ghena melli yaden; no donki nu ajühchu ben den lethu ketha-u saaden.

²⁴Kemetsa nyithu na keben-keyeng pi mathu kutimen sayaden, isala kejüphonthu tsü mathu kejüphon ghena mathu chüya den.

²⁵Chüza kesü na atsentsa khi lethu kahanglithu hangsha yaden; ma khathansha wi milimesa khe ma anyithu matsa den.

²⁶Apvüwa kenyuwakekü tsüna kenondi nu apvü-nkesa pi ma nu ma theghi cüden.

²⁷No keshü ghüya mvu ben ma? Apvüwa nyuwakü kesa tsüna kahang tssükebvüpenwa.

²⁸Kadimi kesü na anyi khaju miwi kekhang senben khe tsüna ma nyankethangwa tsü; mathu nkenye tsü ma mangla nye.

²⁹Keujüla no ccen ben lethu no kemetsa nyi, isala no alebentsu lethu no khatila jüphon khe pi ccüca keben ketan.

³⁰Lebenkecca tsüna agwo sapi hhanha cüden, isala anonkepvü tsüna aghei kedsakinaa ti kesa kesü.

³¹Keujüla no ketha-uthu pasha lethu no mathu sa kechiwa Anyiza nkekhichi saben; isala keccaketssü pi ketha-uthu ccüca kechi tsüna kekinyi kekuli kesü.

³²Gheshighena nyithu na mathu kekuli nkemehai wina mathu kepasha sengho den, isala anyi kemehaithu na mathu ketsatan na mathu khwe yaden.

³³Kemetsa tsüna kemeghe-kemetsawa kemeshen tsüdi wi la ben; kejüphonthu tsü kemetsa mangla chü nten.

³⁴Ketsatan tsüna mizzatenti sapi di cüden; kesami tsüna mizzatenti nyankekinyen.

³⁵Kadimithu na kedi kesa qothu tsü nenden, isala thowa na mathu jüh meya khe meten cüden.