Read Northern Rengma Naga KEMETSAJÜH 15 Bible Online

KEMETSAJÜH 15 - Northern Rengma Naga bible

KEMETSAJÜH 15

¹Ccapeyi sala luneng kechi tsüna aghekepvü pasha den, isala jükhajüghawa tsüna tsü pfüsi chiden.

²Khathansha wi kemetsa nyithu na ajühkhi khe mathu palakechü sapi mehaipfü chiden, isala kejüphon nyithu na ma men nkemi jüh khishi chiden.

³Apvüwa na apen kahe wi lela mangwa saben khe ghang ben; ithu na kemehai kuli le nkemehai kuli lela ma ithu ghang ben.

⁴Keccaketssü jühthu tsüna kahang sengho den, isala kedaggü jühthu tsüna nghamu la pacha cüden.

⁵Nba na no sansi kechi tsü nkhichi kesa tsüna kejüphon; ma satekemeshon yakeya tsüna kemetsa.

⁶Ketsatan nyithu na mathu keben-keyeng pi tsanqai den, isala gheshighena nyithu tsü agükeccü tsü kegho wi mathu ji tsü bhatagha den.

⁷Kemetsa nyithu na palakechü tsüpi vvüzighe chiden, tsüwa tsü kejüphonthu na nye.

⁸Khathansha wi kemehai nyi na kekhie sa khe Apvüwa na tsü nenden, isala gheshighenathu na ahhansha kesa sen nu ma wi kegho tsü nanmeghü den.

⁹Apvüwa na nkemehai nyi len tsü nanmeghü den, isala mangwa na mehai khe tsü sa ketenthu ghaliden.

¹⁰Keujüla no kesazziwa tsü sa lethu no meten-mesha ntsa saden; keujüla no ketanla no satemeshon meya lethu no shüden.

¹¹Keshü yyiwa wi lela mangwa ben khe pi Apvüwa tuwi khuthiya nben; isalethu anyi kesü khatinu ma kemeshen pi Anyiza wi kuthiya mehai nu?

¹²Kedithangthu na mathu satekemeshon tsü nen nten; mathu khiela mathu miwi kemetsakiwa wi kesansijüh khie nten.

¹³Khathansha wi anyithu na anonghe ben khe mathu na apangzi den, isala khathansha wi mathu na ahathana khe ammi jangthi ben den.

¹⁴Meghemetsa nyithu na chüya mvuden, isala kejüphon nyithu na nkechü tsüpi anonkwen ben den.

¹⁵Ketha-uthu kahang tsüna nhandhila agükeccü, isala anonkeghe nyi na keshüthangla kahang wi anonkwen den.

¹⁶Ketha-u sa nu Apvüwa kemessi tsüna keban sa nu agüccü keben miwi mehaiki.

¹⁷Aghangwen pi no kaghalithu gweghe kedsa tsüna nankemeghüli keben pen wi asa kemehai ntsa kedsa miwi mehaiki.

¹⁸Leben ketsuwa tsüna keccücanli pfüsi chiden, isala lebenkesie na kecca sengho den.

¹⁹Keujüla no nontssü lethu no kahe wi lela sa keyishü metu den, isala no atsentsa sen lethu agükeccü mangla ben nben.

²⁰Atsa kemetsawa na ma ba sapi ma nonghe cüden. kejüphonwa ketan ma jja nkekhichi saden.

²¹Kejüphon nyi na mathu kejüphon witsü mathu nonghe den, isala kemetsathu na kemeshonwa kuliden.

²²Sayakemehai chu kesansijüh tsüdi yaya, isathu no haicen yaden; tsü nkenye tsü no mehaiya nben.

²³Matsü wi ajüh kemeshonwa mukeya tsüna khatila anonghe nu!

²⁴Kemetsa nyithu na keshü wi kewa lenwa tsü nyela kahang wi kewa lenwa tsü tonden.

²⁵Apvüwa na awikesa nyi jjen tsü yasa cüden, isala ma denyilewa keben khwe yaden.

²⁶Apvüwa na nkemehai kemeshenthu tsü nanmeghü den, isala ma ashukesa jühthu tsü nenden.

²⁷Keujüla no atsentsa nkenye wi kiyiya le kiden lethu no ntheghi pi agükeccü wi chiden. Alaa meyala isathu no kesie hang yaden.

²⁸Anyi kemehaithu na mathu nyu npi keluneng wina meshen nanden. Anyi nkemehaithu na kaghajila luneng den, isala tsüna kekivvü pfüsi chiden.

²⁹Khathansha wi kemehai nyithu na kekhie sa khe Apvüwa na tsü kinaden, isala ma nkemehaithu kekhie yacü nten.

³⁰Atukemeza tsüna no sapi anonghe cü, nu ajüh kemehaiwa na no sapi mehai kayi cüden.

³¹No satemeshon kechi tsü kina kaketsü sa lethu no kemetsa nyi.

³²Keujüla no chüya mvu nten lethu no ketanla no patena ben. Keujüla no satekemeshon tsü yaya lethu no metsa kayi yaden.

³³Apvüwa kenyuwakekü tsüna palakechüwa. No kenyuwa npi yakeya wi no satemeni nsathu yishü.