Read Northern Rengma Naga KEMETSAJÜH 16 Bible Online

KEMETSAJÜH 16 - Northern Rengma Naga bible

KEMETSAJÜH 16

¹Ithu na achothu kidenya mehai, isala Anyiza na ajüh sakhenwa ben.

²No no kekuli tsüdila meshonle meshen benla mehai, isala Apvüwa na no kemeshen ghan-nan den.

³Apvüwa wi no kekuli kekiden wi tsü sawegü cülo khieya, isathu no tsüthu kuli kewa wi mehai yaden.

⁴Apvüwa na sachi ketheng tsüdila asakhen na ben; nu gheshighenathu ghena asakhenwa tsüna kededi.

⁵Apvüwa na kekapvü nyi nanmeghüden; ma khiela mathu yala kemeten-kemesha nmula shhuya thsü nben.

⁶Ajühkeya nu aleben tsentsa senlo, isathu Anyiza na no kesami teshi cüden. Apvüwa nyuwakülo isathu nkemehai mangla nmiwi kuli nben.

⁷Khathansha wi no Apvüwa kenen saya khe no nghinyithu pi npvüshangthu sa yaden.

⁸Atsentsa wina keu melli pi benkeya tsüna atsentsa nkenye wi kejon mukeya miwi mehaiki.

⁹No nchothu kidenya mehai, isala Anyiza na no kekulithu tsütson senden.

¹⁰Kadimiwa na Anyiza kekhang sen nu ajühkhi; ma südhe kechithu tsüna keshüthangla meshon.

¹¹Apvüwa na pala kewhu nu kekitegü wi atsentsa nu kejeü tsüdi wi kemeshon tsü nenden.

¹²Kadimithu na nkemehai pvü benya nten, kepaghenanye atsentsawa tsüna kidhan kesü sapi zü cüden.

¹³Kadimiwa na atsentsawa tsü kina mvuden, nu ma thothu na tsü khiten khe nenden.

¹⁴Anyi kemetsawa na kadimiwa sapi ma nonghe thsüle kidenden; keujüla kadimiwa na aghepvü lethu anyi pahan shüya mehai.

¹⁵Kadimiwa kenen tsüna leghe wi akulukeshü na atsankegho sengho keten tsüti kahang na ciwi ben.

¹⁶Kemetsa nu palakechü benkeya tsüna suna nu rükatssü miwi mehai kayi ntsa.

¹⁷Thothu na mehai khe nkemehai teshiya keten len witsü waden; tsalina no khiewa waten khe ghang yalo, tsüna no kahang hangsha cüya mehai.

¹⁸Kekapvü nu awikesa tsüna nyu ssi wa keyasa nu kekhuli wi chi cüden.

¹⁹Satemeni nu ketha-u sa keben tsüna kekapvü nyi kesü sa nu nyu ji khukeya wi ma shei mukeya miwi mehaiki.

²⁰Mangwa pi no sansi cü khe tsü kina kaketsü saya, isathu no haicen yaden; Apvüwa nondi yalo, isathu no anonghe yaden.

²¹Kemetsa wi kezügü nyi tsüna ma chüshikeya wina nyu ma chü yaden; ma jüh mehaipfüthu tsüti ma nyu juchüden.

²²Kemetsa tsüna kemetsathu kahang tssükebvüpen, isala kejüphon nyi sansile kesa tsüna matsü kededi ketan.

²³Kemeghe-kemetsathu na npi kekhi wina meshen nan den; mathu mangwa khi khe tsüna nyu jumehai kayiden.

²⁴Keccaketssü jühthu tsüna anikholi ti, tsü kedsa wi minnunte nu ngwo ghena mehai.

²⁵ No meshonle meshen ben keten tsüna no ssi wa keshü wi chicüya mehai.

²⁶Kekuli nyi kesü pangkenyan tsüna ma sapi apitsü kayi kuli thsüden, kepaghenanye kaghama tsüwi ma nonkwenya mvuden.

²⁷Anyi nkemehaithu na nyu patena cüle kesa lenthu tsü ghang den; mathu jühthu tsü la nkemehai pi mecang ben den.

²⁸Gheshighenathu na ajühjügha khiden; mathu na kekivvü pfüsi chi nu apvüshang yasa cüden.

²⁹Yasayala nyithu na mathu pvüshangthu mechu nu mathu ssi wa keyasa wi chi cüden.

³⁰Anyonmazü nu no ghang ketenthu ghena kiden-kesha yalo; mathu pala nkemehai meshen den.

³¹Kesie kahang tsüna ketsatan kutimen; alikepun tsüna anyankethang liwen kesü.

³²Leben tisie kesa tsüna khang ntsa kesa miwi mehaiki. No ketanla no kekheneng keya tsüna anyunuti maben miwi kekhang sen keya miwi mehaiki.

³³Anyithu na Anyiza kemeshen chüya le kesalina akezen wwiden, isala Anyiza na ma ketanla keluneng tsü südhe cüden.