Read Northern Rengma Naga KEMETSAJÜH 18 Bible Online

KEMETSAJÜH 18 - Northern Rengma Naga bible

KEMETSAJÜH 18

¹Anyi thowa na nyu gwegheya nten khe ma ketanla ma cüki ketan meshen den; ma anyi tsüdila meshon le kesa chü kebenwa tsü hhaghe den.

²Kejüphonwa na ma pala meshenshiya benla nye khe mangla hisha nten; ma sa mvu ketenwa tsü ma khatila nyu miwi metsaki nu kesa pi nyu ccücale saden.

³Kesami nu kejüghe keya manyi gweghe waden. No kenyuwakü teshi isathu no tsü kuti wi kimenni keya muyaden.

⁴Anyi kesü jühthu tsüna kemetsa kebvüpen kesü atssükedone kedhu, nu akuza lle wa keten ti saya mehai.

⁵Kesazziwa sheipi nu nkesazziwa ya kemeshon mu keya tsü khen keten tsüna nmeshon le.

⁶Khathansha wi kejüphonthu pahan na kiccücanli shagha khe mathu kihhe kecü khie bendha.

⁷Khathansha wi kejüphonwa na ajühkhi khe ma ketanla ma yasa bendha; ma ketanla ma jüh wina ma dieyaden.

⁸Ajühjügha kekhi tsüna minnun ntsawa, ithu khatila tsü mejichi yamvu nu!

⁹Kenontssü nyiwa tsüna yasa ketenwa nkemehai tsüti kesa.

¹⁰Apvüwa na aducü kezü kesü ti kesa, ketsatanthu na ciwi wala apvü-nsala benya mehai.

¹¹Kebanthu tsü mathu keben-keyeng tsüna misi nu zü ntsa kesa akhweti sapi anyunuti vüketheng tsüti mathu khweya benle kesa meshen den.

¹²Anyi kesü ma ketanla ma satemeni nkesa tsü nyu ma nyuwakü nten; awikesathu na kededi len wi tendha.

¹³No npi keluneng wina kinalo. Keujüla no tsüti nsalethu no jüphon nu kimenni bendha.

¹⁴No hang mvuthi kesa kemeshen tsüna no naa keben wi no satezü cüden, isala keujüla no tsü bhatagha lethu no kaghang sakhenwa tsü la bvüaden .

¹⁵Meghe-metsa nyi na keshüthangla chüya mvu nu kiden ben den.

¹⁶No anyi nyankemechanwa metu mvu ben kwe? Aju kesü sen wa ma cüthu tsüna lekete saaden.

¹⁷Ajühkekaghatenpen wi kematang nyiwa na ma npi kina keshagha wi atuwa sa kekhiwa tsüna keshüthangla meshon ben le meshen den.

¹⁸Keujüla ajühkekaghatenpen wi anyi kekhang ntsa keni na kematangli ben lethu akezen kewwi tsüna tsü südheya mehai.

¹⁹Ncünyuwa kiqa cülo, isathu ma anyunuti kezü ti no khwe yaden, isala keujüla no ma ssinu kitagha lethu ma ntuwi ma jenkathu khen yaden.

²⁰Njühkhi kechi tsüdi kenie wina no hangden.

²¹No mangwa khichi khe tsüna no kahang pi tsanqai cü nyelela yasaya mehai; tsalina no njüh kutimen tsü meyathu yishü.

²²Awubvü kesü bha yalo, isathu no pala kemehai bhayadha; tsüwa tsü Apvüwa na nghena mehai le kesa pi no ccüca kechi.

²³Khathansha wi ketha-u nyi na ajühkhi khe ma meza-megüshu khiden, isala khathansha wi kebanwa na luneng khe ma jükhajügha saden.

²⁴Apvüshangkesa pahan na kesie ben nten, isala apvüshangthu pahan na cünyunyi miwi ajühkeyaliden.