Read Northern Rengma Naga KEMETSAJÜH 21 Bible Online

KEMETSAJÜH 21 - Northern Rengma Naga bible

KEMETSAJÜH 21

¹Apvüwa na lekete nu akuza lle kewa len tsütson keten tsüti ma kadimiwa kemeshen la ghansen ben den.

²No kemeshen tsü no kekuli tsüdila meshon le kesa meshen benla mehai, isala Apvüwa na nleben kemeshen tsüdila ghan nanden kesa meshen yalo.

³Mangwa na tsatan nu meshon khe tsü kulilo; tsüna ahhansha sengho Apvüwa kecü miwi ma kenen saya den.

⁴Kedithang nu kekapvü na gheshighena nyi ghan sen ben den, nu hana kesami ntsa.

⁵Meshen kaketsü salo isathu no meshumena sa ben yaden; keujüla no kaghaji mtsü kuli lethu no khiela keyaqo benya nben.

⁶No atsentsa nkenye wina keben mukeya tsüthu tsüna no ssi wa keshü wi npi kechi wi wan nmila ben.

⁷Gheshighenathu na mathu keyasa kekuli ghena shü yaden; mathu na kemeshon kekuli tsü hhaghe den.

⁸Kesazzi nyithu na alen kekhhakhu tonden; kesazzi nkemithu na mangwa meshon khe tsü saden.

⁹Awubvü jükhajügha kesü ssinu ajjen wi hang kesa tsü ajjenmili wi hang kesawa la mehai.

¹⁰Gheshighena nyi na keshüthangla nkemehaiwa nmvu ben den; mathu na anyi kesüla nanketizen nmi.

¹¹Khathansha wi kedithangwa na kemeten muya khe mangla meshen nketenwa la kesansi chüyaden. Anyi thowa na metsa khe ma sansi kechi wi tsü chüyaden.

¹²Ketsatanwa Anyiza na gheshighenathu jjen wi mangwa saben khe chüben, nu ma gheshighenawa zansha pi keyasa wi chi cüden.

¹³Keujüla no ketha-uthu kiqai hhai tsü nkinala lethu no kekiqa ghena kiqai hhai tsü la nkinala den!

¹⁴Keujüla anyi kesü nmiwi ma ghepvü ben lethu kekuthi wina aju pi ma kecü tsüna ma ya ccen ben wa thsüaben.

¹⁵Khathansha wi atsentsawa kuliya khe kemehai nyi na anonghe den, isala nkemehai nyi pi ahathakina wi chi cüden.

¹⁶Keshü tsüna anyi kesüle kesü lela kemeshen kemehai wina bvü ketenwa tsü hie ben den.

¹⁷Kisengtssü nu kedsakejjü kemehai dsajjü kesa wi anonkeyeng tsüna khiela no sapi keben-keyeng saya thsü nben.

¹⁸Gheshighenathu na anyi kemehaithu miwi ketizenkesa sa chile kekiden tsü sengho mathu ketanla mathu miwi chi yaden.

¹⁹Awubvü jükhajügha, ma leben nkaghajüh khiben ketenwa gweghe hang kesa tsü ayyi keshü kesü wi kahangwa la mehai.

²⁰Kemetsa nyithu na keben-keyeng nu anonkekwen wi hang den, isala kejüphon nyithu na kaghajila mathu pisa pi yasa den.

²¹Ccatssü nu atsentsa sentenlo isathu no kesie hang yaden; kepathu na no kü nu kemeshon wina no ssinu hang den.

²²Süpahi kedi kemetsawa na anyi kezü na anyunuti hie keben tsü yaya, nu mathu maghaki keben wikeshonthu tsü la yasaya mehai.

²³Keujüla no agükeccü wina shhuya mvu lethu no mangwa khi khe kiden-kesha yalo.

²⁴Anyi kedithangwa pi hi ccücalo isathu hi anyi kesü kinankeli, kapvü nu nyucüki nkemeshenwa pi no ccüca den.

²⁵Anyi kenontssü nkuli mvula hhaghe ketenwa na ma ketanla ma pathi keben ketan;

²⁶ma kemeshen tsüdila ma mangwa benya mvu ben khe tsü ketan. Isala anyi ketsatanwa tsü pi cü, nu mohhola pi cüya mehai.

²⁷Khathansha wi gheshighenathu na ahhansha sapi ma kinyi khe Apvüwa na tsü nanmeghü den, keujüla mathu nkemehai kemeshen wina tsüthu tsü sa lethu.

²⁸Milikemesawa jüh tsü nondiya nten, isala anyi kesü ajjügithu meshen nan ketenwa jüh tsü yaya den.

²⁹Ketsatan nyithu na mathu ketanla mathu chütiben; gheshighenathu na mathu saya kemehai chu nkenye ghe saden.

³⁰Anyi kemetsa, chüshikeya, nu palakechü -— tsüna no kiqa meya keujüla Anyiza na no matang ben lethu.

³¹No aghikesa ghena goruthu kidenya mehai, isala khangkeya khuchi ketenwa tsüna Apvüwa le.