Read Northern Rengma Naga KEMETSAJÜH 24 Bible Online

KEMETSAJÜH 24 - Northern Rengma Naga bible

KEMETSAJÜH 24

¹Anyi nkemehaithu miwi anyon nsala, nu mathu ssinu apvüshang sale nkidenla.

²Kekivvü pfüsi cüle kesa tsüna mathu meshen ketenwa tsü; mathu pang ka kechi tsüdi wi anyi pahan patena tendha.

³Ajjenku tsüna kemetsa nu chüshikeya

⁴Khiewa palakechü ben khe ajjen tsüwa keshondhithu tsüna ma men kedhu nu tsikemehai pi ma tsisaden.

⁵Metsa keben tsüna zü keben miwi mehaiki; anle, palakechü tsüna kezü miwi nsenthu yishüki.

⁶Kepaghenanye, no aghi npi kesali wina kiden-kesha nu acho kiden meyathu yishü, nu no khati jikayi kesansi kemehai muya khe tsüti no khang yaden.

⁷Kemetsa jühthu kekhi tsüna kejüphon nyiwa na chüshiya le kesa na dhu mtsü. Nsenthu keyishü jjügithu keccünengli keben wi ma mangla khi keya nmi.

⁸Keujüla no keshüthangla nkemehai meshen benten lethu no agükeccü bhachi ketenwa le kesa tsü melli yaden.

⁹Kejüphon kekuli kekiden katsü ha lela meshen keshhugho tsüna kesami. Anyithu na thowa na mangla nyela nyu nankeqheten khe tsü nanmeghü den.

¹⁰No sakeyishü tsü kesü wi nkhang lethu no ntsakhiwa nkhang.

¹¹Atsentsa nkenye wi anyi kesü pi shü thsü le kebenwa tsü hangsha le kesa nkisütula.

¹²Tsüna no kekuli-u nyele khiya mehai, isala Anyiza na chüben nu no kemeshenthu ghan nan den. Ma no ghangki ben: ma chüben. Nu ma no mangwa kuli khe tsü qe wina nkutimen pi no cüden.

¹³Itsa, anikholi dsalo; tsüna mehai. Nu anikholi tsüna nmili wi minnun kesa ti,

¹⁴no kemetsa tsüna kahangli ghena mehai le kesa chüya mehai. Kemetsa yayalo isathu no atumeza yaben.

¹⁵Gheshighenawa na anyi atsentsawa tengdsa le kekuli kekiden nyelela ma jjen khuya le kesawa tsüti nsala.

¹⁶Anyi atsentsawa na ma khaju tughu khuli khe ma keshüthangla shagha neng den; isala kededi na gheshighenathu yasa cüden.

¹⁷Nghinyiwa kededi metu keya wi anonghe nyelela ma kekhuli wi anonyeng nsala.

¹⁸Apvüwa na tsü chüben nu keujüla no tsüti sa lethu ma nen nben; nu ma anyi tsüwa nmeten-meshala la nchü.

¹⁹Nkemehai nyithu ya nleben patena thsü nsala; mathu miwi n-nyon nsala.

²⁰Gheshighenawa na atusen mangla nmi—— mangla ghangya kemehai nmi.

²¹Apvüwa nyuwakekü benlo, itsa, nu kadimiwa kinyikülo. Tsüthu matang ketenthu tsü gweghe nu mangla nkulila:

²²tsüti kesa nyithu tsüna khili yasaya mehai. Anyiza nyelela kadimiwa na kededi khuchiya kemehai tsü no chü neng yaten ma?

²³Kemetsa nyithu na pala hathu la khitheng; Pendhewa na kinan kepapa kesa tsüna kesazzi.

²⁴Keujüla ma kinansa kebenwa tsüna kesazzi nmi le khishi lethu anyi tsüdi ma kishencü nu ghang mvu nben.

²⁵Isala, pendhethu thowa na kinansa kebenwa meten-mesha cü khe mehai kayi nu anyankemehai pvü yaden.

²⁶Atsentsa keluneng tsüna apvüshang tsentsa zensu kesü.

²⁷Nllithu kidenya nu no kahang ghena melliya mehaidha kesa chüti npi keya chu njjen nsala nyelela atheghi sakewa nkidenla.

²⁸Mehaitsü meshen n-nanla anyi kesü matang nyelela ma miwi ketsütson zzi jüh nkhila.

²⁹“Ma imiwi mangwa sachi khe hi la sachi den! Hi ma la pi wwaya cüden!” isa nkhila.

³⁰Hi, kenontssü, kejüphon nyiwa lli nu kemeshentsse lli tsü pvüdhi wa.

³¹Tsüthu tsüna aghazü tonthu na pong nu kepaghathu na shigü bhon ben. Aghapeng sa pi tsüthu vüketheng tsüna bvücadha.

³²Hi tsü ghangchi, tsü cüki meshen, nu ciwi kesansi kesü chüya:

³³ Kumu nu jenya. Nkwen kemisükili nu keu mnanya,

³⁴isala no jen keben jü, kahhatu tsüna aghighe sapvü nu tengdsa ketenwa ti no kaghashen ghoden.