Read Northern Rengma Naga KEMETSAJÜH 28 Bible Online

KEMETSAJÜH 28 - Northern Rengma Naga bible

KEMETSAJÜH 28

¹Gheshighenathu na thola mathu nkeka lela bvüden, isala nyi atsentsawa tsüna ssensitemi kempvüza ti kesa.

²Khathansha wi mizzatenti na kesami sa khe ciwi kekhang kesen kepapa kesa kejon na ben den. Isala khathansha wi meghe-metsa nu mejumejü ketenthu na accülithu saya khe mizzatentiwa tsü zükeqhe nu kesie ben yaden.

³Anyi kekhang kesen thowa na ketha-uthu pashaten khe tsüna atsankegho keshathi na yangdsaketenthu yasa keten tsüti kesa.

⁴Keujüla no ayenwa kenyuwa nmi lethu no gheshighenathu wiwa sadha; isala no tsü nieya lethu no mathu matang yaben.

⁵Nkemehai nyithu na atsentsawa tsü mangwa khe nchü, isala thowa na Apvüwa kinyi ten khe mehaitsü tsü chüben.

⁶Ketha-u sa nu meshonkeya tsüna keban sa nu nkemeshon miwi mehaiki.

⁷Kepvünyi thowa na ayenwa nie ten khe ma meghe-metsa den. Thowa na kemehai nkemithu ssinu apvüshang sa ten khe tsüna ma ba nyankinyen den.

⁸Keujüla no kekiyi khie nu anyithu miwi nghena kemehaiwa bha nu benya lethu no keben-keyeng tsüna meshu kesü ketha-uthu tuwi ccatssü ketenwa miwi wa ben.

⁹Keujüla no ayenwa tsü n-nie lethu Anyiza na no kekhiethu tsü kina nontssü ntsa saden.

¹⁰Keujüla no nkemehai kekuli pi anyi kemehaiwa mechu lethu no ketanla nca wi khuli du yaden. Kesazzi nkemithu na akutimen mehaitsü muyaden.

¹¹Kebanthu na keshüthangla mathu metsa le meshen den, isala ketha-uthu thowa na ayencüki chüten khe mawa chü kayiben.

¹²Khathansha wi anyi kemehaithu kekhang sen shagha khe anyi tsüdi anonghe den, isala anyi nkemehaithu na kekhang kesen wi anyithu na kuthi waden.

¹³Keujüla no no kesamithu kuthi pvüben lethu no kahang wi khiela mehaiya nben. Tsüthu khishi nu teshilo; isathu Anyiza na nanketizen pi no ccüca den.

¹⁴Keshüthangla Apvüwa jüh nie isathu no n-nonghe yaden. Keujüla no nleben-dhu lethu no yasa yaden.

¹⁵Ketha-uthu na gheshighenawa matangle kesa kekhang nmi; ma ssensitemi aghekina nyelela aduweng na nyu keka keten ti kesa.

¹⁶Kemeshen kemehai nkemi kekhang kesenwa tsüna kemessi keben kesü saden. Anyi thowa na nketsatan tsü nanmeghü ten khe ma kesie kekhang sen den.

¹⁷Anyi kepathi wi kesazziwa na kaghaji nu ma ketanla ma shüjjen chhü bendha. Ma khenle nsala.

¹⁸Ajüh tsentsa sen tenlo isathu no kemessi nmi. Keujüla no ajüh tsentsa nsa lethu no zuli khuliaden.

¹⁹Aghechen sa allica ketenwa kedsakejjü meshhumena yaden. Matsü pi yasa keten nyi na keshüthangla ketha-u saden.

²⁰Kemeshon nyithu na cenqo nu anonghe hang den. Isala no wanwan nu benya mvu ten lethu no meten-meshaya tendha.

²¹Nyu kemeshensa tsüna kesazzi. Isala pendhethu pahan na alaa kizza lela yale kesalina kesazzi kuliden.

²²Apvükemenethu na benya le kesa ghena kaghaji den, isala khathansha wi mangla nkemi tsüna ghoten khe mathu na tsü nchü.

²³Anyi kesü satemeshon chi, isathu nkhe wi ma ajüh kenyan miwi anyi tsüwa nen den.

²⁴Anyi thowa na ma bajja ji kaghanfü tsü nsazzi le meshen khe ma kaghanfü nyi miwi nmehaiki.

²⁵Apvükemene tsüna agükeccü ketan pfüsi chiden. No Apvüwa nondi keyawa nghena mehai ntsa.

²⁶No ketanla no kemeshen ketan kenie tsüna kejüphon. Nmiwi kemetsaki kesansijühthu tsü nieya, isathu no apvükesa nmi.

²⁷Pi ketha-uthu cülo, isathu no khiela nmila sa nben. Keujüla no ketha-uthu wi n-nyon kemaya lethu anyithu kejonla no kishencü den.

²⁸Khathansha wi nkemehai nyithu kekhang sen shagha khe anyithu na kuthi waden. Isala khathansha wi mathu kekhang wina qanca khe ketsatan nyithu kekhang sen neng yaden.