Read Northern Rengma Naga KEMETSAJÜH 29 Bible Online

KEMETSAJÜH 29 - Northern Rengma Naga bible

KEMETSAJÜH 29

¹Keujüla no satemeshon kechi kaghapeng leben-dhu lethu ghanan kesü no pachaden nu khiela sapfüneng meyadha.

²Ketsatan kekhang kesenwa pi hi ccücalo, isathu hi anonkeghe nyithu pi no ccüca na. Gheshighena kekhang kesenwa pi hi ccücalo, isathu hi hang kemenithi kesa nyi pi no ccüca den.

³Keujüla no kemetsa nen lethu nba na nghena kapvü den. Keqheza menkedsa wi npisa pi keyasa tsüna kejüphon kekuli.

⁴Khathansha wi kadimiwa na kemeshon kekuli wi lebenchi khe mizzatenti na zü ben den, isala khathansha wi ma apisa ketan meshen khe ma ma diyyiwa tsü yasa den.

⁵Keujüla no npvüshangthu wi ajüh kenyan ketan khi lethu no ketanla aca pi no die theng.

⁶Anyi nkemehaithu na mathu ketanla mathu kesamithu wi yayaden, isala kemeshon nyi na anonghe nu kekhenkagha nmi.

⁷Anyi kemehaiwa na ketha-uthu kemeshon tsü chüben, isala gheshighenathu tsü tsü chü nten.

⁸Nyu nkenyuwathu na anyunuti maben pi kekivvü wi khala chiya mehai. Thothu na metsa khe pala tsüdi pi ccen sa thsüden.

⁹Khathansha wi anyi meghe- metsawa na ayen kemeshon sengho kejüphonwa matang khe kejüphonwa na keqhe, magha nu kishencü den.

¹⁰Ajjü yamvu ketenthu na anyi thowa na meshon khe tsü nanmeghü den, isala ketsatan nyi na tsüti kesa nyiwa kahang khwe yaden.

¹¹Kejüphon nyi na mathu ghekepvü tsüpi nyu chü thsüden, isala meju-mejü ketenthu tsü lebensie nu tsü kekheneng yaden.

¹²Keujüla kekhang kesenwa na milikemesa jüh witsü ma lebenchi lethu ma kekhu wi kedithu tsüdila milikemesathu saden.

¹³Ketha-u nyiwa nu ma kepashawa manyi kesü, Apvüwa na anyon pi manyi qho cü.

¹⁴Keujüla kadimi kesü na ketha-uthu kemeshon sheipi lethu ma matsü kesie kekhang senya den.

¹⁵Satemeshon nu sansikha kesa tsüna ghanyithu ghena mehai. Keujüla ghanyiwa ma ketanla ma kemeshen sa lethu ma jja ya ma ghena kejügheya thsüden.

¹⁶Khathansha wi nkemehai nyithu na kekhang sen shagha khe ayen kepazzi jikayi den. Isala ketsatanthu na hang nu anyi hati kesathu keqanca muden.

¹⁷Ntsawa sansikha yalo, isathu no keshüthangla ma ghena kapvü yaden. Ma khiela no ya kejügheya thsü kesa jjügi khuchi nben.

¹⁸Anyiza lenketsütson nkemi wi anyithu na kuli kemaghan mangla nmi. Anyi Anyiza yen nie ketenwa na anonkeghe ntsa.

¹⁹No amaghawa ccüneng mele kesa tsüna ma satemeshon meya. Ma tsü chüya mehai, isala ma kaketsü sa tsü nie nben.

²⁰Pala nmeshenla ajühkhi ketenwa miwi kejüphonwa kejüphon na ma kaghang jikayi.

²¹Keujüla nmaghawa ma ghanyi keben na ma keya mvu tsüdi pi ma cü lethu ghanan kesü ma nji tsüdi senya den.

²²Anyi wan ma lebentsu ketenwa na kekitagha nu agükeccü pfüsi chiden.

²³Kekapvü tsüna no zanshaden, isala keujüla no no satemeni ten lethu nyu no küden.

²⁴Kaghanfü kegweghewa tsüna ma ghinyi nkemehai ntsawa. Ma keujüla ajüh kekaghatenpen witsü ajüh tsentsa khi lethu ma meten-mesha yaden, nu keujüla ma tsüti nsa lethu Anyiza na ma kishencü den.

²⁵Kepathu na no mangwa le meshen ten khe tsü meshenki kesa tsüna kemessi ben, isala keujüla no Apvüwa nondi lethu no apvü-nsa.

²⁶Anyi tsüdi kekhang kesenwa kenen tsü nmvu den, isala Apvüwa wi ketan no atsentsa tsü muya den.

²⁷Ketsatanwa tsüna gheshighenathu tsü nanmeghü den, nu gheshighenathu na ketsatanthu tsü nanmeghü den.