Read Northern Rengma Naga KEMETSAJÜH 3 Bible Online

KEMETSAJÜH 3 - Northern Rengma Naga bible

KEMETSAJÜH 3

¹Hi mangwa pi no sansi cü khe mali nsala, itsa. Hi no ya mangwa salo kiza khe keshüthangla tsü meshenya.

²Hi kesansijüh tsüna kesie kahang nu mehai kayi kesa pi no cüden.

³Ajühkeya nu aleben tsentsa tsü ya khiela bvü thsü nsala. Tsüthu pi nsun kejiya; tsüthu pi nleben wi zhükiya.

⁴ Keujüla no ha saya lethu Anyiza nu anyi la no nenthi saaden.

⁵Nleben tsüdi pi Apvüwa nondi tenlo. Khiela no chüben le kesa tsü maghaki nsala.

⁶No kekuli tsüdi wi Apvüwa meshenya, isathu ma kemeshon lenwa tsüpi no ccüca den.

⁷ Khiela no ketanla no metsa le nmeshenla; Apvüwa jüh nie nu kesazzi kekuli tsü hhagheya.

⁸Keujüla no isathu tsüna dawa kemehai na no kekhumathu sapi mehai nu no kinaa satecca cü keten ti saben.

⁹Nlli wi mukeya jawi kemehai ntsawa tsüpi Apvüwa cü nu ma kinyikü tenlo.

¹⁰Keujüla no isathu asu pi nsabethu pong yaden, nu kedsautssü tsüna ji mtsü pi tsanqai nkeyakhi saaden.

¹¹ Itsa, Apvüwa na no satemeshon lethu meshen kaketsü saya nu no kitsanchi ben le kesa chüyalo.

¹²Apvüwa na ma ghali ketenthu satemeshon den, aba kesü na ma tsa meshen pi mehai ketenwa tsü satemeshon keten ti.

¹³Metsa keyawa na kemihhi ntsa, ma chüshikeya muyaden.

¹⁴Tsüwa tsüna rükatssü miwi kiyi nu suna miwi ma men dhuki.

¹⁵Kemetsa tsüna alon menkedhu miwi ma men ben; no keyamvu kesütanla pi tsü ghapeya nben.

¹⁶Kemetsa na kesie kahang, keben-keyeng nu kekinyikü la pi no cüden.

¹⁷Kemetsa na no kahang sapi anonkwen nu apvü- nsala no ssishhu den.

¹⁸Metsa keyathu na anonghe yaden; kemetsa na kahang pi mathu cüden.

¹⁹Apvüwa na ma kemetsa wina ayyi sachi; ma palakechü wina ma atssan pi ma pen wi chicü.

²⁰Ma kemetsa na aghakuthu sapi lle wa thsü nu akulukeshü ya atsangho pi ayyi cü thsü den.

²¹No no kemetsa nu chüshikeya tsü ghansen yalo, itsa. Tsüthu tsü ya khiela no wina bvü thsü nsala.

²²Tsüthu tsüna kahang pi no cüden — anonkekwen nu anonkeghe.

²³No apvü-nsala alen wi waya mehai nu khiela nccümeshü nben.

²⁴No jenwa lela messi nben, nu no aghaja thangthang cca jen yaben.

²⁵Zuli kededi na gheshighenathu miwi caghamo sa gho keten ti kesa tsü nmessila mehai.

²⁶Apvüwa na no pi apvü-nkesa wi chi cüden. Ma no ya aca wi du thsü nben.

²⁷No saya kemehai kekhang keben wi kahhatu nyi ghena kemehaiwa salo.

²⁸Keujüla no khili njenphonwa kiqaya kemehai ben lethu ghanen wi kecu hie ben lalo nkizala.

²⁹Njenphonwa patena le nkidenla; ma no nondi nu nkete wi hang den.

³⁰Ma jjügi nkemi wi nyu no nkenen sa nkethengthu ssinu nkiccücanlila.

³¹Yasayala nyithu miwi anyonsa nyelela mathu ti kuli le nmeshenla,

³²Kepaghenanye Apvüwa na nkemehai kuli ketenthu nanmeghü den, isala ketsatanthu tsü meshen pi mehaiya den.

³³Apvüwa na kishen-keshi pi gheshighena jjen wi chiden, isala sawegü pi ketsatan jjen wi chiden.

³⁴ Apvüwa na dithang ketenthu nsenla mehai, isala ma kenen pi satemeni ketenthu ccücaden.

³⁵Kemetsa nyi na kenyuwa qo nyankethang tsü muyaden, isala kejüphon nyi tsü anyankinyen pi mathu wwaya keten ketan.