Read Northern Rengma Naga KEMETSAJÜH 30 Bible Online

KEMETSAJÜH 30 - Northern Rengma Naga bible

KEMETSAJÜH 30

¹Hathu hana Jakeh tsawa Agur jüh tsentsathu: “Anyiza hi gweghe nten, Anyiza hi gweghe nten, nu hi kekiqa nmi.

²Hi anyi nyela aghangsa ti sadha; chüshikeya anyi miwi ben keten tsüna imiwi nmi.

³Hi khiela kemetsa mangla chü meya, nu hi Anyiza cüki mangla nchü.

⁴Thowa na tang wi palakechü tsü chüyadha nu? Thowa na kusi ma kwen wi ameghü ghan tenya nu? nyelela athsü kesü pi atssü mejuya nu? nyelela ayyi ggüthu pi shengchi nu? Ma thowa nu, no chüben ma? Ma tsa na thowa nu?

⁵“Anyiza na ma jühkhishi kechi tsü nieten. Ma wi khwekeya bha ketenthu ghena ma atsonhi kesü ti kesa.

⁶Keujüla ma nkhi lela khi le khvu lethu ma no kha nu no milikemesa nyi le kesa pi ccüca chiden.”

⁷Anyiza, hi ya npi keshü qo wi pala keni benya thsülo khie ben:

⁸milikemesa wi hi kekheneng cü, nu hi ya ben ntsa nyelela ketha-u ntsa la nsa thsüla. Isala hi kedsakejjü nsenthu keyishü tsü ketan pi hi cülo.

⁹Keujüla hi kejon benya lethu hi no nsenla mehai le khiya mehai. Isala keujüla hi ketha-u sathu, hi ghanfü nu anyankekinyen sengho iNyiza cüya mehai.

¹⁰Khiela amaghawa theng pi ma pvüwa nkizala. No kishen-keshi mu yaden nu tsü ghena ketizensa den.

¹¹Anyi pahan na mathu ba kishencü nu anonkeghejüh la pi mathu jja ccüca nten.

¹²Anyithu na mathu nmethatha lela mathu metha ben le meshen den.

¹³Anyithu na mathu ketanla mathu mehai ben le meshen den, — O, mathu na khatila mehaile meshenten nu!

¹⁴Ciwi anyithu na aghe nmehaila ketha-u nu nkemithu miwi kekiyi bhaden; tsüti sa nu hangya keten tsüna mathu yen.

¹⁵Aghawen kesü tsüna ma nga keni ben, nu manyi nyan qho chi pi, “Pi hi cülo!” sa theng. Ciwi anonkwenya nketen ajjügi mejü na ben;

¹⁶keshüthu yyi, atsanga nkemi nzawa, atsankegho nsenthu keyishü ayyi keqha, nu khen nkeya anni keqhe.

¹⁷Anyi kesüle kesü lela ma ba nankeqhe nu ma jja keqhai nan-nontssü ketenwa tsü akamang kemcüwathu ya ma dsa thsülo nyelela aduwethu ya ma nyonthu mcü thsülo.

¹⁸Ciwi amansa ntsa nu ighena chüshi nkeya jjügi mejü na ben:

¹⁹amumu na atssan wi pighe, amaghang na alonshi miwi wa, ahunjjen na atssükedone miwi ma len bhaya, nu npvüza-nza kenenli keten.

²⁰Hawa ha leben tsentsa nkenye wubvüwa kekulithu: ma keqheza kuli nu atssükizü nu khi, “Isala hi mangla kepazzi nkuli na!”

²¹Ciwi pala mejü ayyi ketanla pvü benya nten:

²²nssümagha kesü na kadimi saya kesa, kejüphon kesü na ma kedsa mvu tsüdi keben,

²³nyu ma nanmeghüthi keten nzawa na n-nuwa kesa, nu maghale kesü ma pvüwa pen nkaya keten.

²⁴Ayyi wi aghangsa achopvü ntsa kesa mejü na ben:

²⁵Atsawethu: mathu na nzü, isala mazu wi mathu tsse pi saghu yaten.

²⁶Amekhiethu: mathu la nzü, isala mathu na alonshi wi mathu ku saten.

²⁷Ashiqathu: mathu kessiwa nmi, isala mathu mayen wina kuliten.

²⁸Amizzathu: no nkwen wi kesü ghan senya mehai, isala kadijjenthu wi tsüthu mu shan den.

²⁹Ciwi pala mejü mathu lenketsen ghang mehai ntsa kesa na ben:

³⁰Ssensitemi, aghangsa tsüdi jawi kezü ntsawa nu mangla nmessi;

³¹anenithu, awegü ghaponthu kugoe keten, nu kadimithu na ma nyithu tuwi keten.

³²Keujüla no jüphon pi awisa nu nkemehai cho kiden gho lethu ngan nu meshen nanlo!

³³Keujüla no tsenitssü deyeng lethu matsen mu yaden. Keujüla no anyi kesü mitsan shun cü lethu ajjü na keji den. Keujüla no aghekepvü pfüssi chi lethu no kekivvü wi du yaden.