Read Northern Rengma Naga KEMETSAJÜH 4 Bible Online

KEMETSAJÜH 4 - Northern Rengma Naga bible

KEMETSAJÜH 4

¹Nthu ba na mangwa pi nthu sansi cü khe kina yalo, Kina kekaketsü saya, isathu nthu na meshenshikeya ben yaden.

²Hi pi nthu sansi kebenwa hana mehai, tsalina tsüthu tsüdila meshen yalo.

³Ibajja tsa hi ketan, hi pvüzanyi sa keben wi,

⁴iba na hi sansi. Ma hi kizala, “Hi mangwa pi no kiza khe khiela tsü mali nsala. Hi no kekiza ti salo isathu no hang yaden.

⁵Kemetsa nu chüshikeya yayalo! Hi mangwa pi no kiza khe mali nyelela nkhichi nsala.

⁶Kemetsa tsü teshi nsala, isathu ma no khwe yaden: ma tizenya, isathu ma no pi apvü-nkesa wi chi cüaden .

⁷Kemetsa yakeya tsüna no saya kemehai kemechan ntsawa. No mukeya tsüdi wi chüshikeya la yayalo.

⁸Kemetsa tsü tizenya, isathu ma no sapi di cüden. No ma lapengya isathu ma kenyuwakü pi no cüden.

⁹Ma ketizen thighi kesü pi no miyan thsüden. Ma n-nyankethang liwenwa saaden.”

¹⁰Ijüh kina yalo, itsa. Hi mangwa pi no kizaben khe tsü meshen ntsa sa yalo, isathu no kesie hang yaden.

¹¹Hi kemetsa nu ketsatan kahang lenwa pi no sansi cüdha.

¹²No metsashhu alentsen lethu mangla nlen khenya nben, nu no kebvü wi nccümeshü nben.

¹³Keshüthangla no mangwa chüyadha khe meshen tenlo. No kechü tsüna no kahangli—tsü noncca kemehai saya.

¹⁴Anyi nkemehaithu kewapen wi nwala. gheshighena nyi tsütsonca tsü n-niela.

¹⁵Tsü nsala! Nkemehai ssi temejaya! Tsü ghü nu nlen wi walo.

¹⁶Gheshighena nyithu na pala nkemehai pahan npi kulikeya chu jenya nten. Mathu na anyi kesüla npi patena keya chu jencan ben den.

¹⁷Gheshighena nu yasayala tsüna mathu ghena kedsakejjü ti kesa.

¹⁸Ketsatanthu na wa keten len tsüna aghani keshhugho ti, aghanan npi kesa chu wegü kayi ben den.

¹⁹Isala gheshighenathu len tsüna aghaja kejang ti. Mathu khuli, isala mangwa meshükiya khe muya nten.

²⁰Hi mangwa pi no kiza khe meshen kaketsü saya, itsa. Ijühthu tsü kinaya.

²¹Khiela tsüthu tsü ya no ntemeja thsüla. Tsüthu meshen nu pi nleben wi tsanqaiya.

²²Tsüthu tsüna kahang nu kahanha pi tsüthu chükeyathu cüden.

²³No khati meshen khe kiden-kesha yalo; no kemeshenthu ti no kahang la tsüti saaden.

²⁴Khiela atsentsa nkenye tsü nkhila. Milikemesa nu tsütson zzi jühthu sen nu mangla nsala.

²⁵Atsentsa wi kempvüza sa nu atuwi ghang yalo; jüghe nu nli zan mecüggü nbenla.

²⁶ No mangwa kuli khe kiden kemehai saya, isathu no kekuli tsüdila meshon yaden.

²⁷Nkemehaiwa ghüya nu atu wi meshonqhe walo. Acükha kesüla ketsatan len wina nbvüla.