Read Northern Rengma Naga KEMETSAJÜH 5 Bible Online

KEMETSAJÜH 5 - Northern Rengma Naga bible

KEMETSAJÜH 5

¹Itsa, no meshen kaketsü sa nu hi kemetsa nu chüshikeya ha kina yalo.

²Isathu no khati mehaitsü nhangthu yishü khe chüya, nu njüh wina no palakechü benle kesa pi ccüca yaden.

³Anyi kepawa wubvü jühthu tsüna anikholi ti minnun nu ma kekimang tsüna Oliv dile ti tsatsan benlaya mehai,

⁴isala tsüthu tsüdila cenkeya sengwi, ma kekha nu kinaa khe mangla pi no cü nten.

⁵Ma no ssinu keshü yyiwi waden; ma wa keten len tsüna keshü lenwa tsü le.

⁶Ma kahang wi kewa len tsü ton nten; isala kegoedeja, nu mangwa saben khe chü nten.

⁷Khili ijüh kina yalo, itsathu, nu khiela hi mangwa khiben khe nmalila.

⁸Nza tsüti kesawa wina temeja yalo! Ma jenka la tetsaki nwala!

⁹Keujüla no isathu no kuti kenyuwakekü ben keghowa tsü nyu na khuya den, nu no ghanyi keben wina nanketizen nkemithu kwen wi shüaden.

¹⁰Anle, kijünyi thu na no keben-keyeng tsüdi khuya, nu no kuli kethengthu tsüna nyu ji saaden.

¹¹No keshü we wi dha nu ghadhi den, nzü nu nsa nmila wa keten wi,

¹²no khiden, “Mangkesa na hi chü meyala nu? Mangkesa na thola ya hi satemeshon nthsüla nu?

¹³Hi kesansithu jüh nkinala. Hi mathu wi ileben nchila.

¹⁴Nu zuli hi anyi jawi hi kejüghe ya keben chüya.”

¹⁵Nwubvü wi nleben tsentsa sa nu no kaghali pi ma ketan cülo.

¹⁶Nza kepa wina atsanga mu keya tsü nghena mangla kemehai sachi nben.

¹⁷Nkechünyithu nyela, n-ngathu ya shagha no kiqa ncü thsüthu yishü.

¹⁸Tsalina nwubvü ssinu n-nongheya nu no ssiben ketenwa nzawa wi no kenen saya—

¹⁹ma tsikemehai nu keccaketssü na amishü ti kesa. Ma tsikemehai tsü ya no sapi n-nongheya thsülo; ma kaghali ya no vüya thsü.

²⁰Mangsa le no kaghali pi nza kepathu cüa nu, itsa? Mangsa le no anyi kepawa wubvü tsikemehai nmvu ten nu?

²¹Apvüwa na no mangwa kuli khe tsüdila muben. No khiewa wa khe ma no ghang ben.

²²Gheshighena nyiwa kesamithu tsüna aca kesü. Ma ketanla ma kesami wi ma yayaden.

²³Ma kekheneng keya nkemi ghena shüden. Ma jüphon ntsa kesa tsüna ma kesun pi ma shüjjen wi chiden.