Read Northern Rengma Naga Sansichhü 2 Bible Online

Sansichhü 2 - Northern Rengma Naga bible

Sansichhü 2

¹Hi ketanla inonkwen nu anonkeyeng tsü bhaya le südheya. Isala hi tsü la kaghacang le kesa chüya.

²Hi kekiqhe tsüna kejüphon, anonkekwen tsüna nghena kemehai mangla saya nten kesa chüya.

³Hi kemetsa ya mvula jügü keten wi kisengtssü tsüpi inonkwen nu matsü kemehai saya le südheya. Hi anyithu na ayyi wi matsü keu ketan kahang wi ha alen kemehai ntsawa saya mehai le meshen.

⁴ Hi pala keti sacen yadha. Hi ighena ajjenthu saya nu kemeshentsse llithu sayadha.

⁵Hi asanku saya nu ciwi kedsauton len kepapa tsüdi pi sheng;

⁶hi atssülen hhisen wa le kesalina aghajü la chhüya.

⁷ Hi amaghathu kejonla shüya, nu ijjenku wi kepvügha amagha kejon na ben. Hi ituwi Jerusalem wi kahangthu tsüdi miwi asahangthu jikiben.

⁸Hi kekhang sen keben yyi witsü kadi keben wi suna nu rükatssü saghu pi thengya. Nza nu npvüzathu na akhwisa pi hi saki, nu hi npvüza kesü na benya mvu keten nza tsüdila benya.

⁹ Anle, hi kedi nyi kesü, ituwi Jerusalem wi kahangthu tsüdi miwi diki, nu hi kemetsa na hi nteshi.

¹⁰Hi mangwa yamvu khe tsüdila ben. Hi hi kenen mangla hhaghe nsa. Hi hi kekulithu tsüdi ghena kapvü, nu ha tsüdila ikutimen.

¹¹Tsasengwi hi hi kulikeya nu khatila apitsü nu kuli khe tsü cüki tsüdi meshen chi nan tsüna mangla nye kesa hi chüya. Tsüna ameghü jügü keten ti ma men mangla nmi.

¹²Kepaghenanye kadimiwa kesü na kheni kadimithu na mangwa satheng khe tsü ketan saya mehai. Tsalina hi kemetsa, kedeja, nyelela kejüphon jjügi tsüna mangwa khe meshen nan wa.

¹³Oh, hi chüben, “Kethang na kejang miwi mehaiki kesa tsüti kemetsa na kejüphon miwi mehaiki.

¹⁴Kemetsa nyi na mathu khiewa waten khe chüben, isala kejüphonthu tsü tsüti nye.” Isala metuketen tsü makesü na ithu tsüdila hie ben kesa la hi chüben.

¹⁵Hi ketanla meshen, “Kejüphonthu miwi mangwa sa khe tsüna imiwi la saghaben. Tsalina hi metsa kesa ghena kekiyi mangwa muya nu?” Hi luneng, “Mangla nye, kaghacang.”

¹⁶Thola kemetsa nyile kejüphonthu lela meshenya nten. Atsathang gha keten wi nyu na ithu tsüdila maliaben. Ithu kejüphon le kemetsa lela tsüdila shüaben.

¹⁷Tsalina ighena tsü kahang ha ma jjügi mangla nmi, kepaghenanye ciwi tsüdila agükeccü sen kegho ketan. Tsüdila kaghacang; nu hi ameghü jügü keten ketan.

¹⁸Hi kekuli nu mellikeya tsü ighena mangla nmi, kepaghenanye hi tsü teshi pi ishiwa sa ketenwa theng cüaben kesa hi chü,

¹⁹nu ma kemetsa nyi sa ghabenla kejüphon nyi sa ghaben khe thowa na chüben nu? Isala ma hi kekuli tsüdi, ayyi hawi hi kemetsa wina ighena mellikeya tsüdila yayaben. Ha tsüdila kaghacang.

²⁰Tsalina hi apitsü ntsa kuli kesalina aseng meshenneng wa .

²¹No no kemetsa, kemetsa-kemena, nu sapichü sen nu pala pahan ghena kuli, nu no tsü teshi pi nyu tsü ghena nkekulithu theng cüaden . Ha la kaghacang, nu tsüna nmeshon le!

²²No kahang wi agüccü ntsa nu kuli, nu no tsü ghena pi ccücaya kemehai mangwa ben nu?

²³ No hang keben chu no kekuli tsüdi wi ahathakina nu alikedhamang sen kegho ketan. Aghaja wi lela nlebencca benya nten. Ha tsüdila kaghacang.

²⁴Anyi kesü na saya kemehai ntsawa tsüna ma mangwa melliya khe tsü dsaya nu jjüya, nu anonkwenkeyawa tsü le. Hi ha lela Anyiza wina kegho le kesa chüya.

²⁵Ma wi nkenye no khatinu dsa nu anonkwenya kemehai benya nu?

²⁶ Anyiza na kemetsa, kemetsa-kemena, nu anonkeghe pi ma kenen sa ketenthu cü, nu pi tsüthu cü thsüle kesalina ma kesamithu yala kuli, nu melli pi theng thsüden. Ha tsüdila kaghacang. Hana ameghü jügü keten ti kesa.