Read Northern Rengma Naga Sansichhü 3 Bible Online

Sansichhü 3 - Northern Rengma Naga bible

Sansichhü 3

¹Ayyi hawi pala katsüha sa lela Anyiza na kessi kechi matsü wi saden.

²Ma kepvügha tsü nu keshü tsü ssan chiden, pi kesheng tsü nu kepfü tsü ben,

³kepathi tsü nu sapi kemehai tsü ben, kepheghe tsü nu saya kesa tsü ben.

⁴Ma ahathakina tsü nu anonkeghe tsü sa chiden, anonkegü tsü nu kinashü tsü ben,

⁵ketizenli tsü nu nketizenli tsü ben, kekimangli tsü nu nkekimangli tsü ben.

⁶Ma kebha tsü nu kebhatagha tsü ssan chiden, pi thengkeya tsü nu khala kesa tsü ben,

⁷kemezüqhe tsü nu kekhhwen tsü ben, ccen kesa tsü nu keccünengli tsü ben.

⁸Ma kaghalili tsü nu nankemeghüli tsü ssan chiden, aghikesa tsü nu kecca tsü ben.

⁹Ithu kekuli tsüdi wi mangwa kiyiya nu?

¹⁰Anyiza na akhhi kekiyan pi ithu miwi chitheng kesa hi chüben.

¹¹Ma pala tsüdi ghena matsü sati kesa wi ssan chitheng. Ma ithu ya gha keten wi cüki chüya mvuthi kesa pi cütheng, isala khiela ma mangwa saben khe chüshithaya kemehai pi ithu ncü.

¹²Tsalina hi chükeya na ithu hang keben jüwi ithu saya kemehai chu kemehai ntsawa sa nu anonghethi kesa tsü le.

¹³Ithu tsüdila ithu kekuli ghena mangwa muya khe tsü dsa nu jjü nu anonkekwen-u. Hana Anyiza khukechi.

¹⁴Anyiza na sakechi tsüdila anuphan benden kesa hi chüben. No mangla pi tsü wwa keya nmi nyelela ciwi mangla khusen bvü keya la nmi. Nu Anyiza na pala kesü kekuli tsüna ithu sapi ma kinyikü thsüle kesalina.

¹⁵Mangwa saben nyelela mangwa sa ghoten khe tsüna hatu wi sadha. Anyiza na tsü makesü pi saneng la saneng thsüben.

¹⁶Tsü miwi, nthu na ayyi hawi ketsatan nu kemeshon mithon wi gheshighena muyaben kesa la hi chüyadha.

¹⁷Hi ketanla hi kiza, “Anyiza na ketsatanwa nu nkemehaiwa makesü jühkaghaten ben, kepaghenanye pala katsüha lela matsü ssan ketheng tsü wina sa nu kuliden.”

¹⁸Anyiza na ithu ghan-nan ben, nu ithu na aghangsathu miwi mehaiki nben kesa pi ithu ccüca ben le kesa hi südheya.

¹⁹Kepaghenanye metuketenwa tsü makesü anyi le aghangsa lela hie ben. Kesüwa la kepawa ti shüaben. Manyi qho sahangkechi makesütan. Anyi kesü na aghangsa kesü miwi mehaiki nben, kepaghenanye manyi qho ghena kahangwa ha kaghacang.

²⁰Manyi qho apen kesütan wi wa ayyi ceng waben. Manyi qho ayyi pi saya, nu manyi qho tsü ceng neng wa ben.

²¹Khatinu anyi kesü ghamu na tangwi ki nu aghangsa kesü ghamu na ayyi non du ben le kesa thowa na chüti ben nu?

²²Tsalina hi chü keya na kemehai ntsawa ithu na saya kemehai tsüna ithu kekuli ghena mangwa muya khe pi anonkwen keya-u. Ithu na kepa wi mangla sa keya nmi. Ithu na ithu keshü sengwi khati saaben khe chükeya len mangla nmi.