Read Northern Rengma Naga Sansichhü 4 Bible Online

Sansichhü 4 - Northern Rengma Naga bible

Sansichhü 4

¹Hi tsasengwi ayyi hawi nketsatan sa keben tsüdila ghang nengchi. Nyu mathu kepashathu na qaiben, nu thola mathu kiqa ncü. Thola mathu kiqa ncü, kepaghenanye mathu kepashathu na mathu miwi kekhang ben.

²Hi shü wa kesathu nmvuben; mathu na khili hang kebenthu miwi acenpvü bendha.

³Isala tsü keni miwi pvügha nkeghothu nu ayyi hawi nketsatan sa keben nkemuthu ghenawa mehaidha.

⁴Hi anyithu mangkesa na mehaiya le apiketsü sa kuliten khe la chüyadha: tsüna mathu na mathu jenphonthu keben tsü nyongho-kepvü ghena. Isala tsüna kaghacang, tsüna ameghü jügü keten ti kesa.

⁵Mathu na anyi kesü ma kwen kemesüliya nu ma ketanla khhwenthi shü wa keten tsüna kejüphon kesü saben le khiden.

⁶Tsüti sa benlaya mehai, isala matsü tsüdi wi dhamang ntsa sa nu akwen keni qho pi ameghü ghan yale sa keben miwi keu ketan sen nu lebencca kebenwa mehai kayi.

⁷Hi alen kepa wila kahang hana kaghacang kesa muyadha.

⁸Anyi kesü ma ketan hangden. Ma atsa nmi nu acünyu la nmi, isala ma keshüthangla kuli, nu khiela ma keben ghena ma nonkwenthi sa nten. Ma thowa ghena apiketsü sa kuli, nu ma ketanla ma kenenwa mangla sa nten nu? Tsü la kaghacang nu ketizen sala kahang kesü.

⁹Meshu keni na kesü miwi mehaiki, kepaghenanye manyi gweghe nu mehai kayi kuliya mehai.

¹⁰Keujüla manyi kesü na khuli lethu, kepawa na ma kiqa pi shagha thsüya mehai. Isala keujüla meshu kesütan nu ma khuli lethu, tsüna nmehai mtsü, kepaghenanye ciwi ma kiqa kecü nyi thola nmi.

¹¹Keujüla se lethu, meshu keni gweghe yengkewhe jenya ben, isala no ketan lethu khati nu yengkewhe benya mehai nu?

¹²Meshu keni na meshu kesütan lethu nchala kesa tsü kaghanineng nu ssikaghashenya mehai. Ali kecheng pi kedeggüli kethen tsü padhiale kesa na dhu den.

¹³Anyi kesü ketha-u wina shagha ma diyyi wi kadimiwa saya nyelela atssüzüjjen wina kadipen wi waya mehai, isala keujüla ma keqhai len wi nyu kesansijüh keya tsüpi kejüphon sa lethu, ma kepvünyi kesü ketha-u sa lela kemetsa-kemenawa tsü miwi mehaiki nsa.

¹⁵Hi ayyi hawi hang keben anyithu cüki tsüdi meshen chi nan ciwi mathu jawi anyi kepvünyi kesü na kadimiwa mithon sa yaben kesa hi chüya.

¹⁶Ciwi kadimiwa kesü na anyi khaju miwi kekhang sen ten khe ma kenten nmi; ma kusi shü khe thola ma mangwa kulichi khe ma ghena anonkeghe ben nben. Ha la kaghacang, tsüna ameghü jügü keten ti kesa.