Read Northern Rengma Naga Sansichhü 5 Bible Online

Sansichhü 5 - Northern Rengma Naga bible

Sansichhü 5

¹Kekinyijjen wi wa keten ghena kiden-kesha yalo. Anyi kejüphon, kesazzi nu kemeshonwa chüya nketenthu na ahhanshathu sapi kecü ti nyela chüya le ciwi kewawa mehai.

²No ajüh npi kekhi tuwi tsü meshen nanlo, nu kaghajila Anyiza tuwi njüh nkhishila. Ma tangwi ben nu no ayyiwi ben, tsalina no kekhi-u miwi nkhila.

³No khaju ahathana khe no tsüju aman nkemehai man ben, nu no ajüh khaju khi khe no tsüju kejüphon jüh khiya mehai.

⁴ Tsalina no khathansha wi Anyiza tuwi ajüh khishikechi kesü sa khe no saya kemehai chu wan tsü nie yalo. Ma kejüphon tsü nen nten. No mangwa khishidha khe tsü salo.

⁵No kekhishi kesü sa nu tsü saya nkeben tsü nkhishila kesawa nghena mehai.

⁶Njühthu ghena no ssi wa kesami wi nchi thsüla, isanu no wa Anyiza keqhaikedi wi tsüna no kesazzi le nkhile kesalina. Mangkesa na Anyiza sapi nmiwi aghepvü thsüa nu? Mangkesa na ma yala no kekuli tsü yasa thsüa nu?

⁷No aman kejon man, kaghacang kekuli kejon sa, nyelela ajüh kejon khi lela no Anyiza kekinyikü nbenthu yishü.

⁸Khathansha wi kidhan na ketha-u pasha nu mathu kemeshon nu atsentsa pi mathu miwi nchila keben muya khe no aman nsala. Kedi tsüdila ma miwi kebenwa na ma khweben, nu tsü miwi kemisikiwa na manyi qho khweben.

⁹Kadimiwa kesü lela ma alli wwikeya tsü maghaki hang den.

¹⁰Keujüla no apisa tepaghaten lethu, no khiela n-nonkwenya nben; keujüla no benya mvuten lethu, no khiela no keyamvu tsüdi muya nben. Tsüna kaghacang.

¹¹No ben kayithu, tsü kedsa nyi shakayi ben den. No kekiyi mukeya tsüdi tsüna no, keban le chükeya.

¹²Kekuli nyi kesü na kedsa qo benlaya mehai nyelela nmi lela ma aghaja wi cca jenya kemehai muyaden. Isala keban kesü tsü kejon keben ghena leben güccü pi jen meyala ben den.

¹³Hi ayyi hawi qhethiketen kesa kesü mudha; anyithu na mathu nsenthu keyishü tsüwi senle kesalina mathu pisa mesha den,

¹⁴nu asen nkemehai pahan wi tsü tsüdila dedi nu mangla pi mathu tsangathu theng kecü nmiladen.

¹⁵ Ithu na kemissü ayyi hawi kegho ti kemissü tsü teshi nu bvüaden. Ithu kekuli tsüdi ben lela ciwi ithu na mangla sen bvüya nben.

¹⁶Tsü ntsakhiwa le! Ithu na ghokea ti wa ben. Ithu na kuli, ameghü tsü ghan yale sa, nu ithu na mangwa muya nu?

¹⁷Ithu na ithu kahang pi kejang nu agükeccü, ahathakina, aghekepvü, nu kinaa wi hangkeya ketan.

¹⁸Hawa ha hi chüshikeyawa tsü: Kemehai ntsawa kesü le kesü lela saya kemehaiwa tsüna Anyiza na kemilu kahang pi ma kecü tsü wi kekuli ghena mangwa muya khe tsü dsa, jjü, nu anonkwenya; hawa ha anyi na metuketenwa.

¹⁹Keujüla Anyiza na keben-keyeng pi anyi kesü cü, nu ma yala tsüthu pi anonkwenya thsü lethu, ma anonghe nu ma kekuli ghena mangwa muya khe pi anonkwenya thsülo. Hawa ha Anyiza wina aju kesü.

²⁰Anyiza na ma ya anonghethi sa thsüle kesalina ma kahang kemilu cüki ghena ma hathana ntsa sa nben.