Read Northern Rengma Naga Sansichhü 7 Bible Online

Sansichhü 7 - Northern Rengma Naga bible

Sansichhü 7

¹ Anyan kemehai tsüna hankedemvu menkedhu miwi mehaiki; nu no keshü tsathang tsüna no kepvügha tsathang miwi mehaiki.

²Kemishu sa keben jjen wi kewa miwi anongü keben jjen wi kewawa mehai, kepaghenanye hang kebenthu na keshü tsüna keshüthangla ithu tsüdila hie ben le kesa meshen keben-u.

³Ahathakina na kekiqhe miwi mehaiki; tsüna no sapi anongü thsüya mehai, isala no ya chüshiya thsüben.

⁴Anyi pahan keshüthangla anonkeghe cüki meshen keten tsüna kejüphon kesü. Kemetsa nyi kesü na keshü cüki tsü meshen ben den.

⁵Kejüphon nyi na no keseng kesaki miwi kemetsa nyi na no kekhawa mehai.

⁶Khathansha wi kejüphon kesü na keqhe khe tsüna anni wi aghazüthu na mbvü keben ti kesa. Tsüna mangla saya nben.

⁷Khathansha wi kemetsa nyi kesü na anyi pahan mechu khe, ma kejüphon kekuli kesü ti saben. Keujüla no alaa khuya lethu, no n-yencüki yasa ben.

⁸Pala pahan asakhenwa tsüna ma dechhü miwi mehai. Leben kesie na awikesa miwi mehai.

⁹ Nleben keminu kekhenengya; leben keminu tsüna kejüphonthu leben wi ben den.

¹⁰No khiela, “Oh, mangkesa na kheni tsüwa mehai nu?” tsüti nkeüla. Tsüna kemetsa-kemena nyi kesü kekeü nye.

¹¹Hang kebenthu tsüdila kemetsa-u; tsüna keben-keyeng ghongya kemehai kesü ti kesa,

¹²nu apisa ti keyazi pi no cüya mehai. Kemetsawa na keyazi pi no cüden, hana kemetsa-kemena ghena kemehai.

¹³Anyiza na mangwa sachidha khe meshen nanlo. Thowa na khatinu Anyiza na sapi khhakhu ketheng tsü sapi meshonya mehai nu?

¹⁴Pala nghena mehaitsü ben lethu, n-nongheya, nu khathansha wi agükeccü na gho khe ha meshenya: Anyiza na anonkeghe nu agükeccü keni qho kesunchi; tsashiwa tsü mangwa sagho ten khe no khiela nchü

¹⁵Hi kahang hana kaghacang sagho, isala hi ciwi na pala tsüdi mudha. Anyi kemehai kesü na shü nu anyi kepawa na nmehai lela hangya mehai.

¹⁶Tsalina mehai ntsawa nyelela metsa ntsawa nsala —mangsa le no ketanla no pathi ben nu?

¹⁷Isala gheshighena ntsawa nyelela jüphon ntsawa lela nsala — mangsa le no npi keshü tsüwi shüa nu?

¹⁸Keni qho pongca mtsü nsala. Keujüla no Anyiza kekinyikü ben lethu, no alentagha wi haicenya metsiben.

¹⁹Kekhang kesen meshu tagha na anyunuti kesü ghena sakeya miwi kemetsawa na anyi kesü ghena jikayi saya mehai.

²⁰Ayyi wi anyi kesüla matsü tsüdi wi kemeshonwa sa nu khiela nsazzila kesa nmi.

²¹Anyithu na kekhi jüh tsüdila nkinala — nmaghawa na no kekimenni jüh zaya ben,

²²nu no ketanla no chüben no kejon tughula anyi kepathu kimennidha.

²³Hi kemetsa sen nu ha tsüdi ghan nandha. Hi metsale sa, isala tsüna ighena dhu mtsü.

²⁴Thowa na khatinu kahang jjügi ha chüya mehai nu? Tsüna ithu ghena dhu mtsü, nu chüshiya le kesa la dhu mtsü.

²⁵Isala hi kemetsa-kemena wi lebenchi nu si; hi kemetsa tsü bhaya nu kekeüthu tsü keluneng muya le sa, nu khatila gheshighena nu kejüphon na jüphon khe tsü cüki chüyale sa.

²⁶Hi keshü miwi kekhangki nzawa tsü muya. Ma kenen pi no kecü tsüna aca nyelela kaghanthsü kesü ti no ghan yaben; nu ma hacü pi no lapeng keben tsüna amighe ssüli kesü ti no bhen yaben. Anyi thowa na Anyiza kenen saten khe ciwi na bvüya mehai, isala nzawa na kesamiwa tsü ghan yaben.

²⁷Kemetsabvüwa na anle, hi keluneng ghang keben wi ashishi sala ha chüyale khi.

²⁸Hi keluneng kepa wi ghang lela kesüla mu meya. Hi npvüza hazar jawi meshu kesütan kekü qo muya, isala nza kesüla mu meya.

²⁹Hawa ha hi chükeya tsüdi: Anyiza na meshon-menaqhe nu milali ithu sachi, isala ithu ketanla ithu sapi alen kejon wi dhu thsüa.