Read Northern Rengma Naga Kesaki khwi 1 Bible Online

Kesaki khwi 1 - Northern Rengma Naga bible

Kesaki khwi 1

¹ Solomon na kesa khwi kemehai ntsathu.

²No npang pi hi kimang ntsa sa; kepaghenanye no hi kenen tsüna kisengtssü miwi mehaiki.

³Ciwi nhankedemvu na ben; n-nyan keci hhai wina tsü chüyaden. Nza thola no n-nenla saya nben.

⁴Hi ssiyalo, nu ishinyi gweghe bvüa na; hi kadimiwa sa, nu hi ssinu no kejenpen wi dulo. Ishinyi gweghe anonghe, jjü ntsa sa, nu ishinyi kenenli ntsa sa na. Aman nsale, nza tsüdila no nen ben le!

⁵Jerusalem nzathu, hi ayyimang isala atsimehai ntsawa, ayyimang pi Kedar yyikeshü wi nithsüjjenthu ti, isala atsimehai pi Solomon kadijjen wi keshonthsü ti.

⁶Hi ayyikeman ghena hi nghangchila nsala, kepaghenanye aghani na hi thsü dekeka theng. Ibaghathu na imiwi aghepvü nu hi ya kemeshentsse lli wi kuli thsüa. Hi itsisa keya tsüla mu meya.

⁷Izi pvüzawa, hi kizalo, Nsahang ssinu khiewa atsse maha wa thsüten nu? Mathu ya ghanan lapvü wi khiewa mnan thsüten nu? Mangsale hi anenikehie kepathu sahangthu jawi no bhaben nu?

⁸Atsikemehai ntsa nzawa, no apenwa tsü nchü kwe? Asahangthu tsü nie walo; anenikehiethu nithsüjjen kete witsü n-nenithu ghena amou bhaya.

⁹No hi kenenwa, hi no pi goru ghala kesü na Farao gorugarithu wi goru süponthu nen keten tsü ghape ben.

¹⁰Nlissen na ndebi miwi jiketsü sasen nsun wi alon menkedhu ti dugho ben.

¹¹Isala ishinyi na suna pi nkhuna thighi sa, rükatssü pi nghethu sa cüden.

¹²Hi kadimiwa na ma we wi khhali ben, nu ideli hankedemvu na tsü pong ben.

¹³Izi pvüzawa na ighena mirr hikhu kesü, ma ideshi miwi nkhwenki keben witsü.

¹⁴Izi pvüzawa na athighe cüpon kesü Engedi wi kemeshentsse lli wi pvü keben ti kesa.

¹⁵Izi ghalawa, no khatila atsimehai nu; n-nyon kekü na khatila no jiketsü nu!

¹⁶Izi pvüzawa, no khatila atsimehai nu; no khatila hi nen nu! Aghan kemejjü na ishinyi we saaben;

¹⁷sedar chan pi ishinyi jjen donbvü sa, nu sipress chan pi ishinyi qae saaden.