Read Northern Rengma Naga Kesaki khwi 2 Bible Online

Kesaki khwi 2 - Northern Rengma Naga bible

Kesaki khwi 2

¹Hi Sharon wi athighI kesü, ayikha ketijü wi ashagha kesü.

²Ashagha kesü na aghazü jawi keben ti Izi ghalawa na nzathu jawi ben.

³Alati ton kesü na ayinong wi achantonthu jawi keben ti, Izi pvüzawa pi kepvüza kepathu ghape ben. Hi ma kekhwen cakhu wi donki mvu, nu ma bi tsüna ighena minnun ntsawa.

⁴Ma hi ssinu ma kemishu jjen wi wa, nu imiwi kenen thsü zanki chicü.

⁵Kemeshentsse keqen pi hi satezü neng cü, nu alati pi hi hhanha nengya thsü ten le! Hi kenmvu ghena shüca wa tendha.

⁶Ma kwen tevüwa pi ili kekhu wi chi, nu ma kwen ajewa pi hi lapeng.

⁷Jerusalem nzathu hi wi khishi chilo; nthu na ishinyi kenenli tsü cüsa nbenle kesa aghamu, nu acenpvüthu nyan wina kishenlo.

⁸Hi Izi pvüzawa hhai zaya. Ma ayikhathu miwi na bvügho, yyishiphon thu pvüdhi sen hi wi gho.

⁹Izi pvüzawa na amejü süpon kesü ti, ameshü süpon pvünyi kesü ti kesa. Ma ciwi ajjen wikeshon kete wi ngan ben. Ma ajjenkubhi wina ghangchi, nu akukebi wi kuthi ghang ben.

¹⁰Izi pvüzawa na hi ccüneng. Izi ghalawa, gholo; Izi ghalawa, gho hi gweghelo.

¹¹Pathsü na cendha; atsan na ngholadha;

¹²agheja wi athighIthu na pvü bendha. Hawa ha akhwikesa tsüwi sadha; alli wi atavüthu kekhou hhai na zaben.

¹³Khhaghabvübithu na nün bendha; ameghü wi kemeshentsse kepvü na hansa gho bendha. Gholo, Izi ghalawa; Izi ghalawa, gho hi gweghelo.

¹⁴No adavü kesü na alonshiku wi kuthi keben ti kesa. Hi ya n-mmi tsikemehai tsü muya, nu no kekhou hhai zaya thsülo.

¹⁵Whewhethu tsü ghan yalo, whewhe kizzakikithu tsü, mathu na ithu lli pvü keben tsü npi keyasa wina.

¹⁶Izi pvüzawa tsüna iji, nu hi ma ji. Ma ma sahang pi ashaghathu jawi atsse ya thsü,

¹⁷aghanen kemejeng nu kejang na npi kebvü chu. Izi pvüzawa, amejü süpon kesü ti gho nenglo, Bether Yikhathu miwi ameshü süpon kesü ti kesa.