Read Northern Rengma Naga Kesaki khwi 3 Bible Online

Kesaki khwi 3 - Northern Rengma Naga bible

Kesaki khwi 3

¹Aghaja kaghapeng iwe wi jen, nu hi kenenwa tsü mangya, hi ma bha wa isala ma mu meya.

²Hi anyunutiwa non wi nu ma lentontithu wi wa. Hi hi kenenwa tsü bha. Hi ma bha wa lela ma mu meya.

³Ghikehiethu na anyunutiwa wi hi mu. Hi mathu wi keü, “Nthu na Izi pvüzawa mula nu?”

⁴Hi mathu teshi nu bvü meyi ma muya. Hi ma ghantenya nu ma ssinu ijja jjen wi hi kepvügha pen witsü npi kewha chu ma ya nbvü thsüla.

⁵Jerusalem nzathu, hi wi khishi chilo, nthu na ishinyi kenenli tsü cüsa nbenle kesa aghamu, nu acenpvüthu nyan wina kishenlo.

⁶Ayyikeshü wi annikekhu kesü ti shhugho, hankedemvu nu mirr, asenkesathu na pi jeü keten han ti kesa ha mangwa nu?

⁷Solomon na ma kadipen miwi ben nu piegho tendha; Israel süpahithu jawi kemehai ntsa achentugho na ma ghihiela ma ssinu.

⁸Mathu tsüdila njünnu kepiechü ntsathu; mathu na aghisa nan kesa nyithu. Mathu tsüdila njünnu pvüden, aghaja wi ssikesali tsü shunle kidenben.

⁹Kadipen miwi Kadimiwa Solomon tsü pieden achan kemehai ntsa pi kesa tsü miwi na.

¹⁰Ma donbvüthu na rükatssü pi meju theng; ma miwi athsü tsüna suna pi ayakhu theng. Ma kedonpenthu na athsü nmiepheü pi meju theng, Jerusalem nzathu na ajikeju sala kede.

¹¹Zion nzathu, ghola Kadimiwa Solomon ghangchilo. Ma keshanyi, anonkeghe nu kenong tsathang wi ma jja na pi ma li miwi chi kecü kadiliwenwa tsü pvüden.