Read Northern Rengma Naga Kesaki khwi 4 Bible Online

Kesaki khwi 4 - Northern Rengma Naga bible

Kesaki khwi 4

¹Izi ghalawa, no khatila atsimehai nu! N-mmi keshang kekhu wi n-nyon kü pi jiketsü saben. Nlissen na kethenghe pi anenithu akhang kesü na Gilead yyishiphon thu wina pencü keten ti.

²Nyha na miki pi khaghaneni ssen ceya nu atssükizü pvü shhugho keben ti. Tsüthu kesütanla nqanca; tsüdila haicencula meceqe saben.

³Nkhemüggü na anonwe nmieman kesa ti; ajühkhithu tsüna no jiketsü. Ndhebi na n-mmi keshang kekhu wi wegüthsü ben.

⁴Nsun na David ducü kezhü ti, Ghabenkhhali nu chenche, ayan tsüna atsonhi hazar kesü pi hakevüli ketheng ti.

⁵Ntseni na amejü süpon keni ti, ameshü zza keni na ashagha jawi atsse yaketen ti.

⁶Hi mirr yyishiphon miwi ben den, hankedemvu yyishiphon wa witsü, aghanen kemejeng nu kejang npi kebvü chu.

⁷Izi ghalawa, no khatila atsimehai nu; no khatila mehai cencu nu!

⁸Iji shanyili, Lebanon Yikhathu wina hi gweghe ghalo; Lebanon wina hi gweghe ghalo. Amana Yikha shoni wina dugholo, Senir Yikha nu Hermon Yikha wi ssensitemi nu shenkitemithu kahang pen wina.

⁹Izi ghalawa nu shanyili, n-nyon nu no meyan keten ayan tsü ghang kechi wi tsüna ileben yasadha.

¹⁰No hi kenenwa tsüna mehai mtsü, Izi ghalawa nu shanyili. No kenenwa tsüna kisengtssü miwi mehaiki; nu nhankedemvu tsüna kepa miwi mehaiki.

¹¹Izi ghalawa, nkhemüggü na anikholi ti minnun; nmili na ighena tsenitssü nu anikholi. Lebanon wi hankedemvu tsüdila nthsümeni wi ben.

¹²Izi ghalawa, shanyili na kekhuthi sanku kesü, ghapeng ketheng nu atssü kebvüpen kesü;

¹³ciwi achantonthu na shigü pi mehaiben. Tsüthu na shigü pi ahhibvü tonthu sanku ti ma bi kemehai ntsathu bünben. Ciwi henna nu nard,

¹⁴saffron, kalamus nu sinnamon, nyelela hankedemvu tsüdila nmetseng . Mirr nu aloe na ciwi shigü pi ma han na mehai ntsa saben.

¹⁵Atssü bvükeben sanku, atssü lle wa keben kuzathu, Lebanon Yikhathu wina lle kedugho kuzathu.

¹⁶Shaghalo, aghawa meghü. Acülawa meghü, sho sen nu isanku wi gholo; ameghü han kemehai pi pong cülo. Izi pvüzawa ya ma sanku wi gho thsü, nu ma bi kemehai ntsa dsaya thsülo.