Read Northern Rengma Naga Kesaki khwi 5 Bible Online

Kesaki khwi 5 - Northern Rengma Naga bible

Kesaki khwi 5

¹Hi isanku wi duyadha, Izi ghalawa, shanyili. Hi hankedemvu nu mirr saghuben; hi anikholi nu anikhotssü dsaben; hi kisengtssü nu tsenitssü jjüben. Kenansulithu, dsa nu jjü yalo, no kenenwa tsü jjü pi ndi npi kina chu!

²Hi jen lela ileben na ka. Hi Izi pvüzawa na gho ajenka kekha keben mangya. Hi ya dugho thsülo, Izi ghalawa, Izi ghalawa, iji adavü. Aghola na ili wi caben, nu ilissen na akejan cakidha.

³Hi athsümeni npvüladha; Mangsale hi athsümeni pvü neng nu? Hi iccü bhudha; Mangsale hi tsü kenenkagha sa neng thsü nu?

⁴Izi pvüzawa na ma kwen pi ajenka wi changchi, nu ma hi tetsakidha le ileben dhendhen saya.

⁵Hi ma ya dugho thsüle kidenya. Mirr pi ikwen pongya, nu hi ajenka sha le ghansen keya wi mirr tssü na ikwenzzathu wi ben.

⁶Hi izi pvüzawa ghena ajenka sha chi, isala ma bvü benla. Hi khatila ma hhai zaya mvu ben nu! Hi ma ghang lela ma mu meya; Hi ma cichi lela kenusha hhai nza.

⁷Ghihiethangthu na anyunutiwa wi hi muya; mathu na hi kiccü nu kihhecha; anyunutiwa wi ghihie kebenthu na ithsümeni mezüqhea.

⁸Jerusalem nzathu, hi wi khishichilo, keujüla nthu na Izi pvüzawa muya lethu, hi kenmvu ghena shüca wa tendha le ma kizalo.

⁹Nzathu jawi atsikemehai ntsawa, nzi pvüzawa na kepa miwi makepa kwe? Ma cüki amankesa mangwa na ben, nu ithu na nshinyi wi ajüh khishichiya nu?

¹⁰Izi pvüzawa na atsimehai nu zü; ma hazar tagha jawi kesü.

¹¹Ma mmi na lezza ti nu chenche; ma lissen na shapi lulu, nu aduwe ti nimugho.

¹²Ma nyon na adavü na tsenitssü wi kizü pvü shhugho akuza katen wi ka keben tsikemehai ti.

¹³Ma dhepi na mehai pi asanku kesü wi aghangthu, nu hankedemvu na pong keben ti. Ma khemüggü na mirr tssü pi decah ketheng ashagha ti.

¹⁴Ma hacü na kezhüshhü, nu ma rükatssü kwenzza keqhan pi qhanpvü. Ma gwo na asayha chenche kesa wi safir pi chiketheng ti.

¹⁵Ma phedi na alabaster donbvüthu pi suna zenzathu miwi kesheng ti. Ma jenkeben na Lebanon Yikhathu miwi sedar tonthu na misi ntsa keben ti.

¹⁶Ma pang pi kekimang na minnun ntsa; ma gwo mabenla hi nen ntsawa. Jerusalem nzathu, Izi pvüzawa na hati kesa le.