Read Northern Rengma Naga Kesaki khwi 8 Bible Online

Kesaki khwi 8 - Northern Rengma Naga bible

Kesaki khwi 8

¹No ibaghawa salo kheshülan, ijja na ma tseni pi hi nitheng. Isanu hi alentonti wi no metuya lethu, hi no kimang cü lela thola mangla khi nben.

²Hi no ssinu ijja jjen wi wa, no ciwi kaghali pi hi sansi cü kesa. Hi kisengtssü pi no cü nu ahhibvü tssü pi no jjüya thsü kesa.

³Nkwen tevüwa pi ili kekhu wi chi, nu nkwen ajewa pi hi lapeng.

⁴Jerusalem nzathu, hi wi khishi chilo, nthu na ishinyi kenenli tsü cüsa nben le kesa.

⁵Ayyikeshü wina ghoketen ma zipvüzawa lapeng sen keten ha thowa nu? Alati ton cakhu wi hi no pamechü chi, no kepvügha pen witsü.

⁶No kinansuli leben pi thola ncüla hi ketan cülo; thola nlapengla isala hi ketan. Kaghalili hana keshü kekhang ntsa ti; kenmvu na keshü kezü ti kesa. Tsüna annikeqhe kekhang ti pvükhhi shhugho nu mecang ben.

⁷Atssü pi tsü zügü tenenya nben; atssüdan lela tsü meyanthiya nben. Isala keujüla anyi kesü na ma keben-keyeng kaghalili tsü shü le sathu, ma kimenni kecü mukeya ketan.

⁸Ikhang na atssüggü lanyi kesü ben, nu ma tseni na kizzakeu saben. Khathansha wi kepvüza nyi kesü na ma yale gho khe ikhang na ma ghena mangwa sa nu?

⁹Keujüla ma ajjen wikeshon kesü sa lethu, ikhang na ma ghena rükatssü ducü kesü zhü kesa. Keujüla ma kaghapeng jenka kesü sa lethu, ikhang na sedar chan kessenthu pi ma khweya kesa.

¹⁰Hi ajjen wikeshon kesü, nu itseni na tsü ducü kezhüthu. Izi pvüzawa na hi ma kegweghe wi anonkekwen, nu kecca muyaden kesa chüben.

¹¹Solomon na apen Baal Hamon kesa wi kemeshentsse lli kesü ben. Ciwi allikecathu na ma wi tsü denga den; kesüsü rükatssü hazar kesü pi cüden.

¹²Solomon na anonkeghe sa rükatssü hazar tsü khuya, nu meza keni na allikecathu shei. Hi iji kemeshentsse lli kesü ben!

¹³Izi ghalawa, hi ya asanku wi nhhai zaya thsülo; ipvüshangthu na njühkekhi zaya le hieben.

¹⁴Izi pvüzawa, amejü süpon kesü ti hi wi gholo, ayikhathu wi aghang han kemehai na shigü keben jawi ameshü süpon kesü ti.