Read Northern Rengma Naga ISAYA 1 Bible Online

ISAYA 1 - Northern Rengma Naga bible

ISAYA 1

¹ 1Lesüshen hawa ha Uzziya, Jotham, Ahaz, nu Hezekiya hathu na Judah kadimithu sa keben tsüwi Anyiza na Judah nu Jerusalem cüki pi Amoz tsawa Isa ccücakechi jühthu.

²Apvüwa na khi, “Atssan nu ayyi, hi khi keben ha kinachilo! Hi noncca keshagha atsangathu na hi ssikaghashen bendha.

³Amesüsi na ma pvüwa chü, nu gada la ma pvüwa na atsse pi ma kecüpen tsü chüden. Isala inyithu Israel tsü tsü nchü. Mathu na nchütha sadha.”

⁴Kesami mizzatentiwa, maghangmeghe nu nkemehai nyithu, nthu na dedi tendha! Nthu kesami na nthu zanshadha. Nthu na Apvüwa Israel Kemetha Nyizawa meya mvuladha, nu ma wina kheneng bvüdha.

⁵Nthu mangkesa na kaghashen ben mvu ben nu? Nthu ha miwi la metenya mvu ben kwe? Israel, nli na ayisü ketan sadha, nleben nu no kemeshen na nkhangladha.

⁶Nli wina cü nccü kecu ngwo wi mangla kemetson nmidha, mesa-mena, khumakhujü, yisüyaghathu na ngwo pongdha; n-mmi wi ayisüthu sa nmetha nu nqhan ladha. Adeli mangla pi n-nyen ladha.

⁷Nthu diyyiwa na yasadha, nu nthu nyunutithu na mecang pi ayyi wi chidha. Nthu na ghang keben wi asangthu na nthu yyi yaya nu pala tsüdila pasadha.

⁸Kemeshentsse lli wi kehiepon nyelela ameji lli wi awajan ti Jerusalem nyunutiwa na ma kekhwe nmila nyu ma vüyadha.

⁹ Kekhang ntsa Apvüwa na anyi pahan mesha pi ntheng cü lethu Jerusalem na Sodom nu Gomorrah ti deditha sa kesa.

¹⁰Jerusalem, n-nyithu nu kekhang kesenthu na Sodom nu Gomorrah nyithu ti le. Apvüwa na mangwa pi no kizaben khe kina yalo. Ithu Nyiza na mangwa pi ithu sansi ben khe ha kina kemehai sa yalo.

¹¹ Nthu kemeshen tsü nthu na kekinyi sapi hi kecü tsü hi yamvu tenle ben kwe? Nthu na khaghaneni nu asahang kemehai ntsathu kethu mecang pi hi kekinyi tsü nsenla mehaidha. Hi nthu mesü, khaghaneni nu aneni jjü ghena inonhidha.

¹²Thowa na nthu hi kinyi le kegho wi hathu tsüdi sen nu gholo khie nu? Thowa na nthu ya hi Kekinyijjen wi thonthon sa kekuli hathu ha salo kiza nu?

¹³Nthu na kekinyi khukechithu sengho lela ma men nmidha. Nthu na hankedemvu mecang pi kekinyi tsü kehan pi inonhidha. Hi nthu na Asha Ketheü Kho, Sabbath yen kenie, nu keccüna ghena saghu ketenthu ha ghangcha ntendha; tsüthu tsüdila nthu kesami ghena nmetha ladha.

¹⁴Hi nthu na Asha Ketheü Kho, nu atsathang kemetha kekinyi tsü nan-nontssüdha. Tsüthu tsüna hi pvü likedhamang khhi kekiyan kesü saben.

¹⁵“Khathansha wi nthu kwen zanki nu kekhie sa khe, hi nthu ghangchi nten. Nthu na khie ntsa saben lela hi kina nten, kepaghenanye nthu kwen wi ajjü na pong ben

¹⁶Nthu ketanla nthu samethalo. Hi nthu na kekuli nkemehai sa keben kemu tsüdila teshi yilo. Ntsakhiwa, nkemehai nsala yilo,

¹⁷nu kemeshonwa kesa yen chüyalo. Kemeshonwa saya — kimenni kebenthu kiqa, magha-maghangthu sheipi, nu denyi-demathu sheikhi cülo.”

¹⁸Apvüwa na khi, “Ithu keccünengli nu südheya na. Kesami na nthu ten pi nmieni sadha, isalela hi nthu bhu pi aghola ti metha cüaden. Nthu ten pi nmieman ben lela sapi asa ssen ti mikidhi sa thsüaden .

¹⁹Nthu na ijüh kina lethu, ayyi wi bün keten kemehaithu tsü dsaben.

²⁰Isala nthu na ijüh nkina mvu lethu, nthu na shü tendha. Hi Apvüwa, hi khidha.”

²¹Kuti tsüwi kenondi qo nyunuti sa keghowa tsüna keqheza menkedsa nyi ti hang wadha! Kuti tsüwi ketsatanthu na tsü pong ben den, isala khili tsü nyu kepathithu ketan sadha.

²²Jerusalem, kuti tsüwi no rükatssü ti sa, isala khili tsü no ma men nmidha; kuti tsüwi no kisengtssü kemehai ti, isala khili tsü no atssü sadha.

²³Nccülikesathu na nyu kematang nu kaghanfü pvüshangthu; mathu na keshüthangla aju nu alaa yaben den. Mathu na ajühkaghatenpen wi magha-maghangthu sheipi nten, nyelela denyi-demathu na mathu kaghatenjüh sengho chi lela kina cü nten.

²⁴Tsalina Kekhang ntsa Apvüwa, Israel Nyiza kekhang kebenwa na khi keben jüh ha kina chilo, “Ighinyithu, hi nthu miwi ijukhiyaden, isathu nthu na hi nkivvüla ben.

²⁵Hi nthu matang den, amighe mecang temetha keten ti hi nthu sametha cüaden, nu nthu nkemetha tsüdila khupi den.

²⁶Kheni nthu wi kekhang kesen nu sansichüthu na ben kegho tsüti pi nthu cü nengden. Tsaseng wi Jerusalem pi ketsatan nu kenondi qo nyunutiwa le ciaden.”

²⁷Apvüwa tsüna tsatan, tsalina ma Jerusalem nu ciwi leben khaphegheya ketenthu tsüdila hangsha yaden.

²⁸Isala anyi kesü le kesü lela sami nu ma ssikaghashen ketenwa pacha cüden; kesü le kesü lela ma meya mvu ketenwa pathiaben .

²⁹Nthu na achantonthu kinyi keten nu kemetha chan ja kesa ghena nthu leben güccü ben.

³⁰Nthu na atssü pi zügü keten sanku wi ayangton na jühwa keten ti shüaben.

³¹Annikeqhe khala na amatsi mecangkiya keten tsüti kekhangthu la mathu kekuli nkemehai na mathu yasa ben, nu thola kededi tsüwa khen meyala ben.