Read Northern Rengma Naga ISAYA 10 Bible Online

ISAYA 10 - Northern Rengma Naga bible

ISAYA 10

¹Nthu na dedi tendha! Nthu na ayen nkemeshon cü pi inyithu meten-mesha ben.

²Tsüti kesalina nthu na ketha-uthu yala mathu ji kesau nu kemeshonwa tsü mu meya thsüla ben den. Tsütinu nthu na denyi-dema nu magha-maghangthu shei khuyaden.

³Anyiza na kemeten pi nthu kecü wi nthu na khati saaben nu? Ma diyyi kelensie wina kededi sengho nthu miwi kechi wi nthu na khati saaben nu? Nthu na bvü sen nu khiewa kekiqa bha wa nu? Nthu keben-keyeng pi khiewa kuthi nu?

⁴Aghi wi nthu yathi nyethu nthu zan sen nu atssüzü sa waben. Tsüti kesa sengwi lela Apvüwa leben ketsu na nmila sa nben; Tsaseng wi lela kemeten pi cü le ma kwen chang sen nu ben den.

⁵Apvüwa na khi, “Assiriya! Hi Assiriya pi achanghon kesü ti sa nu pi hi mathu miwi lebentsu kebenthu meten cüden.

⁶Hi Assiriya kesun pi Anyiza nkechü mizzatenti, hi ya alebentsu thsü ketenwa tsü ssinu kaghashen thsü. Hi tsüthu kesun pi nyu ji shuya nu ghanfüya nu anyithu pi alen wi kenenkagha ti cüten thsüa.”

⁷Isala Assiriya Kadimiwa na ma ketanla ma leben wi nkemehai cho kiden ben. Ma mizzatenti kejon dedi thsüle meshen den.

⁸Ma kapvü nu khi, “Hi kekhu wi kekhang kesenthu tsüdila kadimi kesüsü le!

⁹Hi Kalno nu Karkhemish nyunuti keni yaya, nu Hamath nu Arpad nyunuti keni la. Hi Samaria nu Damaska manyi la yaya.

¹⁰Hi kemeten pi tsikezhü, Jerusalem nu Samaria wi keben miwi la kejiki ben nu kinyi ketenthu cü le ikwen chang chi.

¹¹Hi Samaria nu tsikezhü tsüdila yasadha, tsüti hi Jerusalem nu ciwi kinyi keten tsikezhüthu miwi la saaden.”

¹²Isala Apvüwa na khi, “Hi Zion Yikha miwi nu Jerusalem wi sa keben ha cen lethu, Assiriya Kadimiwa na ammisa keten nu kekapvü ghena hi kemeten pi ma cüden.”

¹³Assiriya Kadimiwa na awisa nu khi, “Hi ketanla hathu tsüdi sayadha. Hi zü, metsa, nu chüshikeya na ben. Hi mizzatenti tsü keni jüwi aggü pasa nu manyi keben pi saghu ketheng khuya. Amesü süpon ti ciwi kahangthu cüten.

¹⁴Ayyi wi mizzatentithu na awa ghacen kesü ti, hi awa ghatsü jjüghu keya ti mathu keben-keyeng saghuya. Agisha kesüla hi kewheng teqha meya. Awa pang kesüla ka pi hi satekü meya.”

¹⁵Isala Apvüwa na khi, “Ampvü na ma sen ketenwa miwi diki le khiya mehai kwe? Achan kaha-nnu na ma pi achan haketenwa miwi nsenthu yishüki kwe? Achanghon na anyi pieki nten, isala anyi na achanghon pieki den.”

¹⁶Apvüwa Kekhang ntsawa na kesakinaa ghei kesun pi khili anonkwen kebenthu miwi chi le saaben. Mathu gwo wi anni na mecang neng neng ben den.

¹⁷Anyiza Israel kewegüwa tsüna anni ceng shaben. Israel Nyiza Kemethawa tsüna annikeqhe ceng nu ghanan kesütan na pala tsüdi mecang shaben; aghazü nu assensü lela.

¹⁸Ayinong kemehai nu keca lli tsüdila yasa cüben; keshü kinaa na anyi yasa keten tsüti saaben.

¹⁹Achanton na zeng ntsa sa nu ghanyi kesü lela siya kemehai saaben.

²⁰Israel nyi hang keyathu na mathu dedikhia le kegho mizzatentiwa tsü nondi nu nhangla keten matsü na ghoden. Mathu na mathu kenondi pi mathu Pvüwa Israel Nyiza Kemethawa miwi chi ntsa wa ben.

²¹Israel nyi kezeng-u ketan na mathu Nyiza Kemethawa wi ghoben.

²²Khili Israel nyi na ji pi atssüketi ghüsa wi ahachan ti ben lela, kezeng-u ketan gho nengben. Kededi na anyithu ghena saghuben, nu tsüna pi cü qo ntsa sadha.

²³Anle, diyyiwa tsüdi wi Kadimiwa Kekhang ntsawa Apvüwa na ma saale keben ti kededi sengho den.

²⁴Kadimi Kekhang ntsawa Apvüwa na ma nyithu Zion wi hang kebenthu wi khi, “Assiriya nyi na Ejipt nyi kekuli ti sa lela nmessila.

²⁵Matsü keujü wi nthu kemeten tsü cen thsüaden, nu tsaseng wi mathu dedi aden.

²⁶Hi Apvüwa Kekhang ntsawa, Oreb lonshi wi kekihheji pi Media nyi kekihhe ti mathu kihheden. Hi kemeten pi Ejipt nyi kecü ti pi Assiriya la cüden.

²⁷Tsü tsüna kegho wi, hi Assiriya kekhang wina nthu lisha chicüaden, isanu mathu yen na nthu ghena akhhi kekiyan nsa laben.”

²⁸Hi nankemeghüthu süpahizi na Ai [7]nyunutiwa tsü yayadha. Mathu na Megrom pvüdhi sen nu wadha! Mathu na mathu tsanqai pi Mekmash wi teshidha.

²⁹Mathu na ayyikaghagu jü tsü pvüdhi sen wa Geba wi jen ben! Rama nyuti wi anyithu na messi ntsa sadha, nu Kadimi Saul nyuti Gibea wi anyithu na bvüdha.

³⁰Yishalo, Gallim nyithu! Kinalo, Laisha nyithu! Khi nenglo, Anathoth nyithu!

³¹Madmena nu Gebim nyu wi anyithu na keshü nmessila bvü bendha.

³²Nansü nankemeghüthu na Nob nyuti wi ben nu mathu kwen misügü nu kejen pi Jerusalem nyunuti wi Zion Yikha ccüca ben.

³³Apvüwa Kekhang ntsawa na achan cüna kewi ti mathu zansha pi kecencha den. Mathu jawi kekapvü nu kemisi ntsawa shüchi pi nu kimenni thsüaden .

³⁴Ampvü pi ayinong-nonpha wi achan keshüchi ti, Lebanon wi achan ton kemehai ntsa kiccü ti Apvüwa na mathu shüchi cüden!