Read Northern Rengma Naga ISAYA 11 Bible Online

ISAYA 11 - Northern Rengma Naga bible

ISAYA 11

¹ David kadishi hana achanton kesü shüchi kesa ti, isala ma chonhi wi ma connie ketheü shhugho keten ti, kadimi ketheü kesü David shicübvüghathu jawi na shaghaden.

²Apvüwa ghamu na kemetsa, pala kechü, nu sapichü pi ma cü nu ma nyi miwi kedi sa thsü le kesalina. Ma Apvüwa kenenwa tsü chü, nu ma kinyiküden,

³nu ma jüh kekina wi ma kenen muyaben. Ma amei wi kaghang nyelela ajüh kelayi sen nu pendhe nben;

⁴ ma methasi nu ketha-u jühkaghaten, nu kekiqa nkemithu kemeshon sheipi den. Ma jühkhukechi wina kemeten pi anyithu cüden, nu nkemehaithu na shü thsüaden .

⁵ Ma ajühtsentsa nu kemeshon sen nu ma nyithu ssiden.

⁶Adenni nu khaghanenithu gweghe ccen hangben; nu ssensitemi na aneni zza gweghe jenben. Amesü zza nu ssensitemi zza gweghe atsse yaben, nu ghanyi na tsüthu hieben.

⁷Amesü nu aduwengthu na gweghe atsse dsaben, nu tsüthu zza na ccen jenben. Ssensitemi na amesü ti amatsi dsaben.

⁸Meme na aji kepvü maghang ssikiponli lela mangla sa nben.

⁹ Anyiza yyishiphon kemetha, Zion miwi mesa-mena nyelela nkemehai na ben nben. Anyiza palakechü na ayyi kepong saaben, atssükedone wi atssü na pong keben ti.

¹⁰ David shicübvügha wi kadimi ketheü kesü na mizzatenti tuwi kemechan kesa tsathang kesü na ghoden. Mathu na kadi nyunutiwa wi saghuya nu kenyuwakü pi ma cüden.

¹¹Tsü tsathang ghothu, Apvüwa na ma kekhang sen nu ma nyi na Assiriya, Ejipt, Pathro, Sudan, Elam, Babylonia, Hamath nu atssü ghüsa wi nu atssükedone mangkehi wi kebenthu ssi neng gho chiaben.

¹²Apvüwa na khangthsü piekiya nu Israel nu Judah nyithu na ayyi ccügwen mejü wi bvüzighe kesathu ssi neng gho saghu bendha le kesa pi mizzatentithu ccüca den.

¹³Israel kadiyyi na Judah ghena anyongho npvü nengdha, nu Judah na Israel nankemeghüwa nsadha.

¹⁴Manyi saghuya nu niduwa na Filistin ssikaghashen gho nishuwa hang ketenthu yasaden. Mathu na Edom nu Moab miwi khang yaden, nu Ammon nyi na mathu jühkina den.

¹⁵ Apvüwa na Suez Ghajü ya qha thsüaben, nu ma ameghü kisa sengho Eufrat mo teqha ben, akuza tagü ketan sa nu anyi tsüdila pvüdhiya kemehai sa thsüaden .

¹⁶Assiriya wi alentonti kesü sapi ciwi Israel nyi hang keyathu cüaden, mathu bamyithu na Ejipt wina shhugho keya tsüti saaden.