Read Northern Rengma Naga ISAYA 22 Bible Online

ISAYA 22 - Northern Rengma Naga bible

ISAYA 22

¹Hawa ha Kemanthi Yyiketijüwa ghena ketsijüh kesü. Mangsa ben nu? Mangkesa na anyunutiwa wi anyi tsüdila ajjenmili wi anongü ben nu?

²Anyunutiwa maben wila magha nu nponmena hhai na pong ben. N-nyithu na aghi wi shü kesa tsüna kesali nu nshü.

³Nthu ccülikesathu tsüdi bvü wa alakusü kesüla npi kega wina mathu ghanya.

⁴Hi ketan teshi pi inyi shü kesathu tsüdi ghena qai ntsa thsülo. Ileben satecca le nsala.

⁵Hana kemessi, khang nkeya, nu kemanthi yyiketijü wi chüshi nkeya tsü kesü. Kemisintsa Apvüwa Kekhangwa na tsü kesun pi ithu miwi chidha. Ithu nyunuti khweti tsü kihheshadha, nu kekiqa kekhie hhai na yyishiphon thu wi kehiki bendha.

⁶Elam yyi wi süpahithu na alamugho nu macü khusen nu goru miwi na gho. Kir yyi wi süpahithu na mathu tsonhi kidenya.

⁷Judah yyiketijü kemehai tsüna aghi gorugari pi pongya; süpahithu na goru miwi ben nu Jerusalem khweti jenka wi ngan.

⁸Judah kedi tsüdila pakhhi zighea. Tsü kesa sengwi, aghitsanqai jjen wi atsanqai sengho.

⁹Nthu na Jerusalem khweti wi khiekhie nsapfüthu yishü khe muya. Nthu na Jerusalem wi ajjen tsüdi ghang nu alon pi anyunutiwa khweti zhüpfü le kesa ghena ajjen pahan pheghe. Atssü saghu le kesa ghena

¹¹aghajü kaghawenwa wina lle dugho keben tssü tsü ghena anyunutiwa non wi atssükhang sa. Isala nthu na matsü kesie keben wina hathu tsüdi kiden nu saya thsü ketenwa Anyiza jüh tsü nkinala.

¹²Kemisintsa Apvüwa Kekhangwa na nthu ya qai nu anongü, nu nthu li whi nu aleshithsü mphilo nthu ci.

¹³ Nthu na tsüti kesawa nyela keqhe nu anonkeghe sa. Nthu na khaghaneni nu amesüsi pathi dsa, nu nthu na kisengtssü jjü. Nthu na khi, “Ithu na dsa nu jjü nalo! Dhitsü wi tsü ithu na shüaben.”

¹⁴Kemisintsa Apvüwa Kekhangwa na ma ketanla hi ccüneng nu khi, “Pala nkemehai hawa ha mathu na hang keben chu teshi pi cü nten. Hi Kemisintsa Apvüwa Kekhangwa, hi khidha.”

¹⁵Kemisintsa Apvüwa Kekhangwa na kadijjen kehiewa, Shebna wi wa hati khilo hi wi kiza,

¹⁶“No thowa le meshenten nu? No nghena yyishiphon lonshi wi ashüjjen hoya kemehai no kemeshon mangwa ben nu?

¹⁷No kemechan nyi sa benlaya mehai, isala Apvüwa na no kushi pi khala ben.

¹⁸Ma no pi ball kesü ti no khuya nu pi diyyi di ntsa kesa kesü wi cüchiaben. No meshen pi kapvü keten gorugari kete ciwi shüaben. No npvüwa theghi nyankekinyen kesü sadha.

¹⁹Apvüwa na no dhamangpen wina no khupi nu npen kemisi wina no zansha cüben.”

²⁰Apvüwa na Shebna wi khi, “Khathansha wi tsü sa khe, hi imaghawa Eliakim tsa Hilkiya kesun chiaben.

²¹Hi no kadi gwokemejuwa kaghazu nu geshi keqhan pi ma pvü thsü nu no senketen kekhang tsüdila pi ma cüaben. Ma Jerusalem nu Judah nyi ghena aba kesü ti saaben.

²² Hi David shicübvüghawa Kadimi kekhu wi kekhang pi ma cütha saaden. Ma dhamangpen wi shakhen senden; ma shathu thola khen meya, nu ma khenthu thola shaya nben.

²³Hi cetenji ti kesa pi apen kesü wi ma ceten khvu saaden, nu ma ma theghi ghena kenyuwakü muya keten nyi saaden.

²⁴“Isala ma shili nu ma maghaki ketenthu na ma ghena akhhi kekiyan saaben. Mathu na ahyi nu akhuthu pi adhasü wi hagi ketheng ti ma miwi maghaki ben!

²⁵Khathansha wi tsü sa khe, cetenji pi ceten khvu kethengwa tsüna kuli nu qanca ben. Nu tsüwa tsüna tsü miwi hagi kebenthu tsüdi ghena asakhen saaben.” Apvüwa na khidha.