Read Northern Rengma Naga ISAYA 24 Bible Online

ISAYA 24 - Northern Rengma Naga bible

ISAYA 24

¹Apvüwa na ayyi yisha nu anyi ya nhang thsüla le bendha. Ma ayyi mi ha kha-nkhwe nu ciwi kahangthu jügüzighe shan ben.

²Anyi tsüdila tsü makesü metuten, keqhaikedithu nu anyithu, amagha nu apvüthu, pala keshei nu kejeüthu, kenna thsüwa nu kennawa, nu kebanwa le ketha-uwa lela.

³Ayyi na gizighe nu yasaben. Apvüwa na khidha nu tsü saaden.

⁴Ayyi na keqha nu jü wa; ayyi tsüdila nkhangla; ayyi nu atssan la bighe.

⁵Anyithu na Anyiza yenwa tsü bheghe nu ma anuphan ghena cenkethenjüh sa kechi tsü n-niela kesa ghena ayyi ya nmetha thsüladha.

⁶Tsalina Anyiza na kishen-keshi kesü khipi ayyi miwi chidha. Mathu na sa kechiwa tsü ghena anyithu na tsü dhiben. Anyi na zeng pfüpfü nu hang wadha.

⁷Kemeshentsse tonthu na jübvü nu kisengtssü na metseng gha tendha. Anonghe ketenthu tsüdila khilitsü ahathana bendha,

⁸nu mathu na harp nu apha sen nu anonghe keten hhaiwa tsü nzaladha.

⁹Kisengtssü ghena nonkeghe khwisa keten tsü nmidha; thola tsü jjü nu anonghe keten tsü nmiladha.

¹⁰Anyunutiwa wi pala tsüdila kivvükepe bendha, nu anyithu na yazishu ben le kesalina mathu jjen non wi khenten pvü nu ben wadha.

¹¹Kisengtssü nmila kesalina anyithu na alentonti wi magha bendha. Anonkeghe tsüna keshüthangla nbendha; ayyi wina tsü khuyadha.

¹²Anyunutiwa tsüna kededi wi bendha, nu tsü khweti- jenkathu na yasadha.

¹³Hawa ha mizzatenti tsüdi nu ayyi tsüdi wila saaben. Tsüwa tsüna alli kewwikhi pang wi oliv ton tsüdi wi ma bi kihhesha nu kemeshentsse ton wi ma bi tsüdila laya keten tsüti saaben.

¹⁴Hang keyathu na anonkeghe ghena akhwisaden. Nidu wi kebenthu na Apvüwa tsüna khatila di khe pi nyu kizaden,

¹⁵nu nishu wi kebenthu na ma sengden. Atssükedone ghüsa wi kahangthu na Apvüwa Israel Nyiza sengden.

¹⁶Ayyi kelensie ntsa wina ithu na Israel, mizzatenti ketsatanwa kesaki khwi zaben. Isala ighena tsü kaghang nmi! Hi nmila wa tendha! Nyu matsa ketenthu na nyu matsa benden, nu mathu na nyu kematsa tsüna nmehai pfü wa ben.

¹⁷Ijüh kinalo, anyi tsüdila! Kemessi kedi, ayyiku kebi, nu aca na nthu hieben.

¹⁸Anyi kesü le kesü lela kemessi ghüle kebvüwa na ayyiku kebi wi qancaduaben, nu ayyiku kebi ghüle kebvüwa na aca wi ma yayaben. Tang wina atsangho shathi ntsa ghoben, nu ayyi maben wila kuliaben.

¹⁹Ayyi na qankhhi nu gizighe pi kepapa saaben.

²⁰Ayyi na ma ketanla adikina nyi ti kedheggü nu ajjen kizzathu na caghamo kesa wi kuliketen ti saaben. Ayyiwa na ma kesami na ma hushadha; tsüna bvüca nu shagha neng nbendha.

²¹Matsü kesü na ghoden, tsü tsüwi Apvüwa na kemeten pi tang wi kekhangthu nu ayyi wi kekhang kesenthu cüden.

²²Anyiza na kadimithu ku ghu pi tssüzüthu ti sala pi ayyiku kebi wi chiaben . Mathu na kemeten tsüwa npi kegho chu mathu pi atssüzüjjen wi khenbhon shaben.

²³Asha na jang nu aghani na nwegüla ben, kepaghenanye Apvüwa Kekhang ntsawa na Kadimiwa saaden. Ma Zion Yikha miwi ben nu Jerusalem wi kekhang senden, nu anyi ccülikesathu na ma nyankethang muden.